పెట్స్ చిన్నవయస్సు నుండి పరిశుభ్రత అలవాటు చేయడం ఎలా..?

Pet Care

oi-Saraswathi

By Sindhu

Published: Wednesday, August 15, 2012, 16:43 [IST]

సాధారణంగా ఇంట్లో పెంచుకొనే పెట్స్ ఆరోగ్యంగా ఉండాలంటే ముందు అవి పరిశుభ్రంగా ఉండాలి. అందుకు యజమానుల వాటిని చూసుకొనే పరిశుభ్రతతో పాటు పాటి వాటికి వ్యక్తిగత పరిశుభ్రతను అలవాటు చేయాలి. పెట్స్ కు క్లీన్ హ్యాబిట్స్ నేర్పించడం ఎలా? ఇంట్లో ఎక్కడ పడితే అక్కడ మలమూత్రవిసర్జన చేయడం, ఆహారం తింటూ ఇల్లంతా తిరగడం వంటి అలవాట్లు లేకుండా క్రమశిక్షణతో పెంచడం సాధ్యమేనా?

పెట్‌ కి క్లీన్ హ్యాబిట్స్ నేర్పించడం చాలా సులభం. ఈ పని పప్పీగా ఉన్నప్పుడే మొదలుపెట్టాలి. అప్పుడే వాటికి పరిశుభ్రత అలవాటుగా మారుతుంది. వాటికి భోజనం పెట్టిన వెంటనే కొంతసేపు బయట తిప్పాలి. సాధారణంగా కుక్కలు క్లీన్‌గా ఉండడానికే ఇష్టపడతాయి.

పొరపాటున ఇంట్లో మూత్రవిసర్జన చేస్తే అది చూసేటట్లుగా దాని మీద పేపర్ వేసి తేమ పీల్చుకున్న తర్వాత ఆ పేపర్‌ను బాత్‌ రూమ్‌లో కానీ బయట కానీ వేస్తే తాను పొరపాటు చేశానని అదే తెలుసుకుంటుంది.

కొంతమంది పెట్ వంటగదిలోకి రావడాన్ని ఇష్టపడరు. అలాంటప్పుడు అది కిచెన్‌ లోకి వస్తున్నప్పుడు పేపర్‌ ని కర్రలాగ రోల్ చేసి నేల మీద కొడితే చాలు. ఈ సంకేతాన్ని చాలా సులభంగా పట్టేస్తుంది, ఇక ఆ ఛాయలకు కూడా రాదు. పెట్ ఏ తప్పు చేసినా సరే... దానికి అది తప్పు అని తెలియచెప్పడానికి ఇదే పద్ధతి. కుక్కలకు తమ యజమానిని సంతోషపెట్టాలని ఉంటుంది.

అది ఏం చేస్తే మనం సంతోషంగా ఉంటామో ఆ పనులే చేస్తాయి. మనకు ఇష్టం లేని పని చేయవు. అయితే అవి మనల్ని అర్థం చేసుకునే వరకు ఓపిక పట్టాల్సిందే. అలాగే వాటిని మనతో సన్నిహితంగా మెలగనిస్తేనే మంచి అలవాట్లు నేర్చుకుంటాయి. అనుక్షణం మనల్ని గమనిస్తూ ఉంటాయి.

భోజనం తింటూ సగంలో ఇల్లంతా తిరగడం మొదలు పెట్టినప్పుడు కూడా పేపర్‌ రోల్‌ తో నేల మీద కొట్టి నియంత్రించడంతో పాటు చక్కగా భోజనం పూర్తి చేసినప్పుడు కాంప్లిమెంట్స్ ఇవ్వాలి. సింపుల్‌ గా చెప్పాలంటే పిల్లల్ని మెచ్చుకున్నట్లే. వాటిని సున్నితంగా తాకితే చాలు అవి ఎంత సంతోషపడతాయో...