కుక్క ఉంటే చాలు జిమ్ కు ఎందుకు దండగా....

Pet Care

oi-Saraswathi

By Sindhu

Published: Wednesday, February 29, 2012, 16:48 [IST]

మనిషికి కుక్క అత్యుత్తమ నేస్తం అనేది పాత మాట. అత్యుత్తమనేస్తాన్ని మించిన నేస్తం అనేది కొత్తమాట. పెంపుడు జంతువులను పెంచుకోవడం అందరూ చేసే పనే. వాటిమీద విపరీతమైన ప్రేమ కురిపిస్తారు కొంతమంది. కొందరైతే పెంపుడు జంతువులే తమ ప్రాణంగా భావిస్తారు. అలాంటి వాటిలో కుక్కపిల్లలు ముందుంటున్నాయి. కుక్కపిల్లలు ఇంట్లో ఉంటే, ఇంట్లో మరో వ్యక్తి ఉన్నంత భావన కలుగుతుంది. సాధారణంగా కుక్కపిల్లలు మనుష్యులను చూస్తే చాలు తోకాడించుకొంటూ ఉత్సాహంగా ఇల్లంతా ఒక్కసారి చుట్టుకొచ్చేస్తాయి. పైకి ఎగబడుతాయి. అంతే కాదు ఇంట్లో వారు వాటిని పలకరించే వరకూ వారు చుట్టునే ప్రదక్షణ చేస్తుంటాయి. అలాంటి కుక్కలు..కుక్కపిల్లలతో మనుష్యులు కూడా చలాకీగా ఉంటారట.

మనుష్యులు మరింత చురుగ్గా ఉండడంలో ఇంట్లోని వారిని చలాకీగా ఉంచడంలోనూ కీలక పాత్ర పోషిస్తాయని తాజా అధ్యయనంలో తేలింది. కుక్కలను పెంచుకుంటున్న వారు సామాజికంగా మరింత చురుగ్గా ఉంటున్నారని, వారు బయట గడిపే సమయం, వ్యాయామంలాంటి శారీరక శ్రమ కూడా ఎక్కువేనని ఈ అధ్యయనంలో తేలింది. జంతువుల్లో కుక్కలు చాలా విశ్వాసంగా ఉంటాయని అందరికీ తెలుసు. పెంపుడు కుక్కలు మంచి నేస్తాలే కాదు...కుక్కలు తెలివైనవి కూడా. అందుకే వాసన పసిగట్టి నేరస్థులను పట్టుకోవడానికి కుక్కలను ఉపయోగిస్తుంటారు.

పెంపుడు జంతువైన శునకం పోషణ, ఇంట్లో పిల్లల భౌతిక చర్యలపై వర్జీనియా యూనివర్శిటీకి చెందిన పరిశోధకులు నిర్వహించిన సర్వేలో పలు ఆసక్తికర విషయాలు వెల్లడయ్యాయి. బద్ధకంగా సోఫాలో అతుక్కుపోయే పిల్లల్ని కదిలించి చురుగ్గా మార్చడానికి ఇవి ఎంతో ఉపయోగపడతాయని తేలింది. కుక్కలతోపాటు నడవడం, పరుగెత్తడం వంటివి కూడా మనిషిని చైతన్యపరుస్తాయని తమ అధ్యయనంలో తేలిందంటున్నారు. కుక్కలను పెంచుతున్న 600 మంది యుక్తవయస్కులపై చేపట్టిన సర్వేలో ఈ విషయం వెల్లడైంది. వ్యాయామం చేసే వారితో పోల్చి చూసినప్పుడు కుక్కలతో నడక, పరుగెత్తడం వంటి పనులు చేసే వారు అంతే ఆరోగ్యంతో ఉన్నట్లు తేలింది.