విదూషకుడే నయం !

అతనికి తన అధ్యయనంలో అంతు పట్టని ఒక విషయం తగిలింది. గురువు గారి దృష్టికి తీసుకువెళ్ళాడు. గురువు గారు ఆ ప్రశ్న వినగానే పగలబడి నవ్వుతూ వెళ్ళిపోయారు. గురువు గారి ప్రతిస్పందనతో ఈ సన్యాసి బాగా నొచ్చుకున్నాడు. ఆయన ప్రతిస్పందన ప్రభావం సన్యాసి మీద తరువాతి మూడు రోజుల దాకా వుండిపోయింది. అతను తిండి తినలేక పోయాడు, నిద్ర పట్టలేదు. మూడు రోజుల తర్వాత గురువు గారి దగ్గరకు వెళ్లి తను ఎంత బాధ పడ్డాడో చెప్పాడు.

ఇది విని గురువు గారు అన్నారు :"సన్యాసి, నీ సమస్య ఏమిటో నీకు ఖచ్చితంగా తెలుసా? నీ సమస్య ఏమిటంటే నువ్వు విదూషకుడి కంటే అధ్వాన్నమైన వాడివి"

సన్యాసి అవాక్కయ్యాడు "పూజ్య గురువుగారు, అంత మాట ఎలా అనగలిగారు? నేను విదూషకుడి కన్నా ఎలా అధ్వాన్నమైన వాడిని?"

గురువు గారు తన ఉద్దేశ్యాన్ని ఇలా వివరించారు "జనం నవ్వుతుంటే విదూషకుడు సంతోషిస్తాడు. నిన్ను చూడు. ఎదుటివాడు నవ్వాడని నువ్వు బాధ పడుతున్నావు. ఇప్పుడు చెప్పు, నువ్వు విదూషకుడి కంటే అధ్వాన్నమైన వాడివేగా?"