Eid-e-Milad-un-Nabi 2022: మిలాద్ అన్-నబి చరిత్ర, ప్రాముఖ్యత

మక్కాలో జననం..!

ముస్లింల సంప్రదాయం ప్రకారం ప్రవక్త జన్మించిన కారణంగా.. ఆయన జ్ణాపకార్థం ఈద్-ఎ-మిలాద్-ఉన్ పండుగను జరుపుకుంటారని 570లో రబీ ఉల్ అవ్వాల్ 12వ రోజు ప్రవక్త మక్కాలో జన్మించాడని చాలా మంది నమ్ముతారు. మిలాద్ ఉన్ నబి పండుగకే మరో పేరు కూడా ఉంది. దీన్నే మావ్లిద్ అన్ - నబీ అని కూడా అంటారు. అరబిక్ భాషలో ‘మావ్లిద్' అంటే జన్మనివ్వడం అని లేదా బిడ్డ పుట్టడం అని అర్థం. ఇస్లామిక్ క్యాలెండర్ ప్రకారం మూడో నెల అయిన రబీ ఆల్-అవ్వాల్ నెలలో ఈ పండుగను జరుపుకుంటారు.

తొలిసారిగా ఎక్కడంటే..

మహమ్మద్ ప్రవక్త మరణించిన తర్వాత, ఆయన ఇంటి వారసులలో ఒకరు మక్కాను ప్రార్థన ప్రదేశంగా మార్చారు. 11వ శతాబ్దంలో ఈద్-ఎ-మిలాద్-ఉన్-నబి వేడుకలు బాగా ప్రాచుర్యం పొందాయి. వీటిని తొలి సారిగా ఈజిప్టు దేశంలో అధికారికంగా జరుపుకున్నారు. ఆ తర్వాత 12వ శతాబ్దంలో ఈజిప్టుతో పాటు సిరియా, మొరాకో, టర్కీ, స్పెయిన్ వంటి దేశాల్లో కూడా మిలాద్-ఉన్-నబి ఉత్సవాలు జరుపుకోవడం ప్రారంభించారు.

దానధర్మాలు..

మిలాద్ ఉన్ నబి పండుగ సందర్భంగా ముస్లింలు అందరూ తెల్లవారుజామునే నిద్ర లేచి మసీదులలో ప్రార్థనలు చేస్తారు. అనంతరం అన్నదాన కార్యక్రమాలు నిర్వహిస్తారు. ఆ తర్వాత తమ సామర్థ్యం మేరకు పేదలకు దానధర్మాలు చేస్తారు. మన తెలుగు రాష్ట్రాల్లోని కడపతో పాటు మరికొన్ని జిల్లాల్లో ఈ పండుగను ముస్లిములతో పాటు హిందువులు కూడా జరుపుకుంటారు. ఈ పవిత్రమైన పండుగ సందర్భంగా అన్నదానాలు నిర్వహించడం ఈ పండుగ యొక్క ప్రత్యేకత. దీన్ని మతసామరస్యానికి ప్రతీకగా చెప్పొచ్చు.

ఈ ఏడాది ఎప్పుడు?

ఇంగ్లీష్ క్యాలెండర్ ప్రకారం ఈ ఏడాది మిలాద్ ఉన్ నబి అక్టోబర్ 8 అలాగే అక్టోబర్ 9వ తేదీన వస్తోంది.