కొత్త బెల్లం, కొత్త చెరకు, మామిడి పూత.....!

ఉగాది రోజున వేకువ ఝామునే లేచి తలంటి స్నానాలు చేసతారు. ఇంటి ముంగిట మామిడి తోరణాలు కడతారు. ఇది ఇంటికి శుభప్రదంగా భావిస్తారు. పూజ చేయటంలో మామిడి ఆకులు, కొబ్బరి కాయ పెట్టి కలశ స్ధాపన చేస్తారు. కలశ స్దాపన అంటే ఇష్ట దేవతలను ఇంటికి ఆహ్వానించటం వంటిది. ఈ రోజున ఆవుపేడ నీటిలో కలిపి ఇంటి ముంగిట చల్లుతారు. రంగు రంగుల ముగ్గులతో వారిళ్ళు తీర్చిదిద్దుతారు. కొత్త వ్యాపారాలు ప్రారంభించటానికి ఈ రోజును శుభప్రదంగా భావిస్తారు.

రుచికరమైన మామిడి పండ్లు రావటం మొదలయ్యే సీజన్ ఈ సమయంలోనే. ఈ పండుగ నాటికి మామిడి చెట్లు పూత వేస్తాయి. కొత్త బెల్లం, కొత్త చెరకు పంటలు కూడా ఇదే సమయంలో వస్తాయి. ఉగాది అంటే చాలు ‘ ఉగాది పచ్చడి ’ గుర్తుకు వస్తుంది. ఉగాది పచ్చడిలో, బెల్లం, పచ్చి మామిడి ముక్కలు, వేప పువ్వు, కొత్త చింతపండు వంటివి వేసి ఆరు రుచులుగా జీవితంలోని మంచి, చెడుల అనుభవాలకు ప్రతీకగా రుచి చూస్తారు.