Supermoon :ఆకాశంలో అద్భుతం..భూమికి అత్యంత దగ్గరగా చందమామ..మిస్ అవ్వకండి

కొత్త ఏడాది 2026 ప్రారంభంలోనే ఒక అద్భుతమైన ఖగోళ వింత జరగనుంది. జనవరి చలి గాలుల మధ్య, ఆకాశం వైపు చూసే వారికి ఒక మనోహరమైన దృశ్యం కనువిందు చేయనుంది. అదే ఈ ఏడాది తొలి సూపర్‌ మూన్. దీనిని తోడేళ్ల పౌర్ణమి అని కూడా అంటారు. ఇవాళ(జనవరి 3,2026) సాయంత్రం.. సాధారణ పౌర్ణమి కంటే పెద్దగా, మరింత ప్రకాశవంతంగా చంద్రుడిని చూడవచ్చు.

వోల్ఫ్ మూన్ అంటే ఏమిటి?
జనవరి నెలలో వచ్చే పౌర్ణమిని పాశ్చాత్య దేశాల జానపద కథల ప్రకారం వోల్ఫ్ మూన్ అని పిలుస్తారు. ఉత్తరార్థగోళంలో తీవ్రమైన శీతాకాలపు రాత్రులలో ఆకలితో ఉన్న తోడేళ్ళు గ్రామాల వెలుపల గట్టిగా ఊళలు వేస్తూ ఉండేవట. అందుకే జనవరి పౌర్ణమికి ఈ పేరు వచ్చింది.

సూపర్‌ మూన్ ఎందుకు అంత ప్రత్యేకం?
చంద్రుడు భూమి చుట్టూ దీర్ఘవృత్తాకార కక్ష్యలో తిరుగుతుంటాడు. చంద్రుడు తన కక్ష్యలో భూమికి అత్యంత దగ్గరగా వచ్చే స్థానాన్ని పెరిజీ అంటారు. చంద్రుడు ఈ స్థానానికి వచ్చినప్పుడు అదే సమయంలో పౌర్ణమి కూడా సంభవిస్తే దానిని సూపర్‌ మూన్ అంటారు.

భూమికి దగ్గరగా ఉండటం వల్ల ఈ రోజున చంద్రుడు సాధారణం కంటే దాదాపు 7 శాతం పెద్దగా, 15శాతం ఎక్కువ కాంతివంతంగా కనిపిస్తాడు. అందుకే ఖగోళ ప్రియులకు ఇదొక పండుగ రోజు.

భారతదేశంలో ఎప్పుడు చూడాలి?
ఈ అద్భుతాన్ని చూడటానికి ఖరీదైన టెలిస్కోప్‌లు లేదా ప్రత్యేక పరికరాలు ఏమీ అవసరం లేదు. కేవలం మీ కళ్లతోనే ఈ అందాన్ని ఆస్వాదించవచ్చు.

భారతదేశంలో సూర్యాస్తమయం తర్వాత సుమారు సాయంత్రం 5:45 నుండి 6:00 గంటల మధ్య తూర్పు దిక్కున చంద్రోదయం అవుతున్నప్పుడు ఈ దృశ్యం అద్భుతంగా ఉంటుంది. మీ ఇంటి పైకప్పు నుండో లేదా ఆకాశం స్పష్టంగా కనిపించే ఖాళీ ప్రదేశం నుండో ఈ ఖగోళ అద్భుతాన్ని చూసి ఆనందించండి

కనువిందు చేసే మూన్ ఇల్యూషన్
సూర్యాస్తమయం అయిన వెంటనే చంద్రుడు క్షితిజ సమాంతరంగా ఉదయించేటప్పుడు మన కళ్ళకు, వాతావరణానికి మధ్య జరిగే ఒక ఆప్టికల్ భ్రమ వల్ల జాబిల్లి ఉండాల్సిన దానికంటే చాలా పెద్దగా కనిపిస్తాడు. దీనినే మూన్ ఇల్యూషన్ అంటారు.

వాతావరణంలోని పొరల గుండా కాంతి ప్రయాణించడం వల్ల చంద్రుడు ఆకర్షణీయమైన నారింజ లేదా బంగారు పసుపు రంగులో మెరుస్తూ కనిపిస్తాడు. మీకు బైనాక్యులర్స్ ఉంటే చంద్రుని ఉపరితలంపై ఉండే క్రేటర్లను కూడా స్పష్టంగా చూడవచ్చు.