నెట్టింట తెగ వైరల్ అవుతున్న బెడ్ రాటింగ్ అంటే ఏమిటి? ఎందుకంత ట్రెండ్ అవుతోంది?

మనకు కాస్త అలసటగా అనిపించినా, ఆరోగ్యం బాగాలేకపోయినా, బాధ ఎక్కువైన, ఓపిక తగ్గినా.. వెంటనే మనం బెడ్ రూంలోకి వెళ్లిపోయి మంచంపై పడుకుంటాం. నిద్ర పట్టకపోయినా అటూ ఇటూ బొర్లుతూ ఏదో ఆలోచిస్తుంటాం. లేదా ఫోన్ పట్టుకొని ఏదో ఒకటి చూస్తుంటాం. ఇది చాలా సహజంగా జరిగేది. అందరూ చేసేదే కూడా. కానీ ప్రస్తుతం సోషల్ మీడియా యుగంలో జెనరేషన్ జెడ్ వాళ్లు దీన్ని మరో కొత్త పేరుతో ట్రెండ్ చేస్తున్నారు. అదే బెడ్ రాటింగ్.

బెడ్ రాటింగ్ అంటే ఏంటి?:
బెడ్ రాటింగ్ అంటే మరేమీ లేదండి. ఎక్కువ సమయం పాటు పడక పైనే ఉండడం. తాజాగా బెడ్ రాటింగ్ పేరుతో వస్తున్న వీడియోలు నెట్టింట తెగ వైరల్ అవుతున్నాయి. అయితే బెడ్ రాటింగ్ చాలా మంచిదని.. ఆరోగ్యాన్ని మరింత మెరుగుపరుచుకోవడంలో ఓ దశ వరకు భౌతిక, మానసిక ప్రశాంతతకు ఇదెంతో ఉత్తమ మార్గం అని కొంతమంది నిపుణులు కూడా సూచిస్తుండడం గమనార్హం.

అమెరికా టిక్ టాకర్ తీసుకొచ్చిన బెడ్ రాటింగ్ ట్రెండ్:
అమెరికాకు చెందిన ఓ టిక్ టాకర్ తొలుత ఈ బెడ్ రాటింగ్ అనే పదాన్ని ఉపపయోగిస్తూ... ఇలా బెడ్ కు అంకితం అవడం ఎవరికి ఇష్టం అని పేర్కొంటూ సోషల్ మీడియాలో ఓ వీడియో పోస్ట్ చేశారు. వెంటనే ఆ వీడియో కాస్త వైరల్ గా మారడంతో ఎంతో మంది లైకులు, షేర్లు, కామెంట్లు చేశారు. ఇప్పటి వరకు ఈ వీడియోను కోటిన్నర మంది వీక్షించారు. మరో యువతి పెట్టిన టిక్ టాక్ పోస్టును మూడు కోట్లకు పైగా చూశారు.

ఏం చేస్తామన్నది కాదు, బెడ్‌పై ఉండటమే ముఖ్యం:
ఇదే తరహాలో అనేక వీడియోలు ఇటీవల టిక్ టాక్ వంటి వీడియో మాధ్యమాల్లో వెల్లువెత్తుతున్నాయి. ముఖ్యంగా ఆరోగ్య సంరక్షణ కోసం నేటి యువతు ఇదే పద్ధతిని ఫాలో అవుతున్నారట. ఎక్కువ సేపు బెడ్ మీద పడుకోవడమే బెడ్ రాటింగ్ అర్థం. సాధారణం కంటే ఎంత ఎక్కువ సేపు మంచానికే పరిమితం అవుతున్నారనేది దీని భావం. ఎందుకు అంతసేపు ఉంటున్నారు, ఆ సమయంలో ఏం చేస్తున్నారనేది ముఖ్యం కాదు.

ఓటీటీలు చూడడం, రీల్స్ చూడడం, సీలింగ్ ను చూస్తూ ఉండిపోవడం, యోగా చేయడం చేస్తుంటే.. మరికొందరు నిద్రపోతుండడం చేస్తున్నారు. అయితే బెడ్ రాటింగ్ మాదిరిగానే ఇటీవలే ఎన్నో చేష్టలు ట్రెండింగ్ గా మారాయి. బాడీ చెకింగ్, వాట్ ఐ ఈట్ ఇన్ ఏ డే వంటి పేర్లతో కూడా గతంలో అనేక వీడియోలు వైరల్ అయ్యాయి.