FIFA & MERS: ఫిఫా అభిమానులకు పొంచి ఉన్న కొత్త వైరస్ ముప్పు

FIFA & New Virus: ఖతార్‌లో ఫిఫా వరల్డ్ అట్టహాసంగా సాగుతోంది. అంచనాలను తలకిందులు చేస్తూ పోటీలు ఉత్కంఠభరితంగా సాగుతున్నాయి. పసికూనలు అనుకున్న జట్లు హేమాహేమీ జట్లను మట్టికరిపిస్తున్నాయి. ఖతార్‌లో ఫుట్‌బాల్‌ మ్యాచ్‌ల సందర్భంగా వివిధ దేశాల నుండి ఖతార్‌కు మ్యాచ్‌లు చూసేందుకు వెళ్లిన అభిమానులకు ఆయా దేశాల ఆరోగ్య శాఖలు హెచ్చరికలు జారీ చేస్తున్నాయి. అదేంటి ఫుట్‌బాల్‌ అభిమానులకు ఆరోగ్య శాఖలు హెచ్చరికలు చేయడం ఏమిటీ అనుకుంటున్నారా..

ఫిఫా వరల్డ్ కప్ అభిమానులకు కొత్త వైరస్ ముప్పు పొంచి ఉందని ఆరోగ్య నిపుణులు హెచ్చరికలు జారీ చేస్తున్నారు. ఖతార్‌లో మ్యాచ్‌లు చూసి తమ దేశాలకు తిరుగు ప్రయాణం అవుతున్న అభిమానుల నుండి కొత్త వైరస్ ఆయా దేశాల్లో వ్యాప్తి చెందవచ్చని ఆందోళన చెందుతున్నారు.

కేమెల్ ఫ్లూ(Camel Flu) లేదా మిడిల్ ఈస్ట్ రెస్పిరేటరీ సిండ్రోమ్(Middle East Respiratory Syndrome - MERS) మెర్స్ గా పిలిచే ఈ వైరస్ ఒంటెల నుండి మనుషులకు వ్యాపిస్తుంది.

కేమెల్ ఫ్లూ అంటే ఏంటి?

పేరులో ఉన్నట్లుగానే ఒంటెల నుండి మనుషులకు సోకే వైరస్ ఇది. ఈ వైరస్‌ను తొలిసారిగా 2012 లో సౌదీ అరేబియాలో గుర్తించారు. 2012 నుండి ఇప్పటిదాకా సుమారు 27 దేశాల్లో ఈ కేమెల్ ఫ్లూ వైరస్‌ను గుర్తించారు. 2012 నుండి 2022 అక్టోబర్ వరకు ఈ వైరస్‌ సోకిన వారిలో 35 శాతం మంది ప్రాణాలు కోల్పోయారు.

ఈ వైరస్ సోకిన వ్యక్తుల్లో జ్వరం, దగ్గు, విరేచనాలు, శ్వాస సంబంధిత సమస్యలు, రోగనిరోధక శక్తి తక్కువగా ఉండే వారిలో, వృద్ధుల్లో, క్యాన్సర్ వ్యాధిగ్రస్తుల్లో, దీర్ఘకాలిక ఊపిరితిత్తుల సమస్యలు, మధుమేహంతో బాధపడేవారిలో ఈ వైరస్ ప్రాణాంతకం కావొచ్చని ఆరోగ్య రంగ నిపుణులు చెబుతున్నారు.

అభిమానులకు హెచ్చరికలు

ఖతార్‌లో ఫిఫా వరల్డ్ కప్ చూసేందుకు వివిధ దేశాల నుండి ఫుట్‌బాల్‌ అభిమానులు పెద్ద సంఖ్యలో వచ్చి వెళ్తున్నారు. వీరి ద్వారా ఆయా దేశాల్లో కేమెల్ ఫ్లూ వైరస్ వ్యాపించే ప్రమాదం ఉందని ఆరోగ్య నిపుణులు ఆందోళన వ్యక్తం చేస్తున్నారు. మెర్స్‌ను తక్కువ అంచనా వేయరాదని, కరోనా మహమ్మారి స్థాయిలో వ్యాపించగలదని ప్రపంచ ఆరోగ్య సంస్థ(WHO) హెచ్చరికలు జారీ చేస్తోంది.

ఖతార్‌కు వెళ్లిన అభిమానులు ఒంటెలకు దూరంగా ఉండాలని, వండని మాంసాలను తినొద్దని, పాశ్చరైజ్ చేయని పాలు తాగొద్దని వివిధ దేశాల ఆరోగ్య శాఖ సూచనలు ఇస్తున్నాయి