Happy Birthday Chiru66 : ‘ఆచార్య’అనుసరించే సిద్ధాంతమేంటో తెలుసా...

చిరంజీవి జననం..

చిరంజీవిగా టాలీవుడ్ లో కీర్తి, ప్రతిష్టలు పొందిన కొణిదెల శివశంకర వర ప్రసాద్ 1955 ఆగస్టు 22వ తేదీన ఆంధ్రప్రదేశ్ రాష్ట్రం పశ్చిమగోదావరి జిల్లా మొగల్తూరు గ్రామంలో జన్మించారు. ఈయన తండ్రి ఒక సామాన్య కానిస్టేబుల్. చిరంజీవి బాల్యమంతా నానమ్మ, తాత గారి వద్దే గడిచింది. నిడదవోలు నుండి మంగళగిరి, మొగల్తూరు ప్రాంతాల్లో పాఠశాల విద్యను, ఒంగోలు సీఎస్ఆర్ శర్మ కాలేజీ ఇంటర్, నర్సాపూర్ శ్రీవై.ఎం. కాలేజీలో డిగ్రీ పూర్తి చేశారు. 1970లో ఎన్ సిసి కేడెట్ గా దేశ రాజధాని ఢిల్లీలో గణతంత్ర వేడుకల పరేడ్ లో కూడా పాల్గొన్నారు.

హనుమ భక్తుడు..

మెగాస్టార్ చిరంజీవి.. అతని కుటుంబం హనుమంతుడిని ఎక్కువగా ఆరాధిస్తారు. అందుకే తన అసలు పేరు శివశంకర వరప్రసాద్ అయినప్పటికీ, అతని పేరు ‘చిరంజీవి'గా మార్చుకున్నారు. చిరంజీవి అంటే ‘ఎప్పటికీ జీవించు' అంటే హనుమంతుడు అమరుడు అనే నమ్మకాన్ని సూచిస్తుంది.

మద్రాసుకు మకాం..

చిరంజీవికి చిన్ననాటి నుండే నటన అంటే ఎంతగానో ఇష్టముండేది. అందుకే మద్రాసు పట్టణానికి మకాం మార్చి, 1976లో అక్కడ ఫిలిమ్ ఇన్ స్టిట్యూట్ లో చేరి యాక్టింగులో ట్రైనింగ్ తీసుకుని.. అక్కడే సినిమా అవకాశాలను ప్రయత్నించారు.

1978లో..

తెలుగు సినిమా రంగంలో అత్యంత ప్రముఖమైన హీరోగా పేరు ప్రఖ్యాతలు సంపాదించిన చిరంజీవి 1978లో ‘ప్రాణం ఖరీదు' చిత్రంతో తెరంగేట్రం చేశాడు. అయితే అప్పటికే ‘పునాది రాళ్లు' సినిమాలు నటించాడు. అయితే విడుదలయ్యేందుకు కొంత ఆలస్యమయ్యింది. ఆ సినిమా 1979లో విడుదలైంది.

1980లో వివాహం..

అలా సినిమాల్లో పాపులర్ అవుతున్న సమయంలోనే ప్రఖ్యాత హాస్య నటుడు అల్లు రామలింగయ్య కుమార్తె సురేఖతో చిరంజీవి పెళ్లి జరిగింది. చిరంజీవికి ఇద్దరు కూతుళ్లు సుస్మిత, శ్రీజ, ఒక కుమారుడు రామ్ చరణ్ తేజ్ ఉన్నారు.

అలా స్టార్ డమ్..

చిరంజీవి సినిమాల్లో ‘ఖైదీ' సినిమా తర్వాత ఎంతో స్టార్ డమ్ వచ్చింది. ఆ తరువాత తను వరుసగా యాక్షన్ మూవీస్ లో యాక్టింగ్ చేస్తూ చాలా బిజీగా మారిపోయారు.

ఎన్నో అవార్డులు..

ఇలా ఎన్నో అత్యద్భుతమైన సినిమాలలో నటించిన చిరంజీవికి భారత ప్రభుత్వం 2006లో పద్మభూషణ్ అవార్డుతో సత్కరించింది. ఇక ఫిలిం ఫేర్ అవార్డులు ఎన్నో వచ్చాయి. వీటితో రాష్ట్ర ప్రభుత్వం అందించే నంది అవార్డులు, రఘుపతి వెంకయ్య అవార్డు కూడా ఆయనను వరించింది. ఇక అదే సంవత్సరంలో ఆంధ్ర యూనివర్సిటీ చిరంజీవిని గౌరవ డాక్టరేట్ తో సత్కరించింది.

ప్రజారాజ్యం పార్టీ..

అలా సినిమాలు చేస్తున్న చిరంజీవి ఒక్కసారిగా రాజకీయాల వైపు అడుగులు వేశారు. 2009లో ప్రజారాజ్యం పార్టీ స్థాపించి.. ఆ ఎన్నికల్లో రెండు చోట్ల పోటీ చేశారు. అయితే సొంత నియోజకవర్గంలో మాత్రం గెలవలేకపోయారు. కానీ తిరుపతిలో మాత్రం విజయం సాధించగలిగారు. ఆ తర్వాత ఆ పార్టీని కాంగ్రెస్ లో విలీనం చేశారు. తర్వాత మళ్లీ సినిమాల్లోకి రీ ఎంట్రీ ఇచ్చారు.

ఫిట్ నెస్ పై అధిక శ్రద్ధ..

మెగాస్టార్ చిరంజీవి ఫిట్ నెస్ విషయంలో అత్యంత శ్రద్ధ కనబరుస్తారు. చిరంజీవి అభిప్రాయం బాడీ ఫిట్ నెస్ అనేది రెండు రకాలు. మానసిక ఫిట్ నెస్ మరియు శారీరక ఫిట్ నెస్. డైట్ అనేది ఎంత ముఖ్యమో.. ఎక్సర్ సైజు కూడా అంతే ముఖ్యమని చిరంజీవి చాలా సందర్భాల్లో చెప్పారు.

చిరు అనుసరించే సిద్ధాంతం..

‘నీ పని నీవు చేయి.. ఫలితం దైవానికి వదిలేయి' అనే సిద్ధాంతాన్ని చిరంజీవి అనుసరిస్తారు. భగవద్గీతలో శ్రీక్రిష్ణుడు చెప్పిన ఈ సిద్ధాంతాన్ని అనుసరించడం వల్ల మనసు ప్రశాంతంగా ఉండేందుకు ప్రయత్నిస్తుందని చెబుతుంటారు. మన పనిని మనం అంకితభావంతో పూర్తి చేశాక ఫలితం గురించి ఆలోచిస్తూ మనసును ఒత్తిడికి గురి చేయకూడదని చిరంజీవి చెబుతుంటారు. అలాగే పిల్లలతో గడిపితే ఒత్తిడి ఇట్టే మాయమవుతుందని చిరంజీవి గట్టిగా నమ్ముతారట.