National Girl Child Day 2021:‘దేన్నైనా పుట్టించే శక్తి వారికే ఉంది’.. అందుకే వారు ఎప్పుడూ ప్రత్యేకమే...

బాలికల రక్షణ కోసం..

బాలికల సంరక్షణ, సంపూర్ణ ఎదుగుదల కోసం కేంద్ర ప్రభుత్వం 2008 నుండి ప్రతి సంవత్సరం జనవరి 24వ తేదీన జాతీయ బాలికా దినోత్సవం నిర్వహిస్తోంది. సమాజంలో బాలికల హక్కులు, ఆరోగ్యం, విద్య, సామాజిక ఎదుగుదల అంశాలపై ఈరోజు అవగాహన కల్పిస్తోంది.

‘బేటీ బచావో.. బేటీ పడావో’

బాలికల సంరక్షణలో భాగంగా నరేంద్ర మోడీ ప్రభుత్వం ‘బేటీ బచావో.. బేటీ పడావో'పథకాన్ని తీసుకొచ్చారు. దీని వల్ల బాలికల చదువు, వారి పెంపకంపై మరిన్ని జాగ్రత్తలు తీసుకునేలా చర్యలు తీసుకున్నారు.

అమ్మాయిల సంఖ్య పెంచేందుకు..

మన దేశంలో దాదాపు ప్రతి వెయ్యి మంది అబ్బాయిలకు కేవలం 940 మంది అమ్మాయిలే ఉన్నారు. అంటే బాలికల సంఖ్య మరింత పెంచాలని, ఆ దిశగా ప్రయత్నాలు జరుగుతున్నాయి. అయితే ఫలితం మాత్రం కొంతవరకే వస్తోంది.

ఆడపిల్లల కోసం పథకాలు..

ఆడపిల్ల పుట్టుక పట్ల తల్లిదండ్రుల ఆలోచనా ధోరణి మారాలని కేంద్ర, రాష్ట్ర ప్రభుత్వాలు అందరినీ కోరుతున్నాయి. అమ్మాయిల రక్షణ కోసం కొన్ని రాష్ట్రాలు ప్రత్యేక పథకాలు కూడా పెట్టాయి. వాటిలో ముఖ్యమైనవి..

ధనలక్ష్మీ పథకం - కేంద్రం

బంగారు తల్లి - ఏపీ

కళ్యాణ లక్ష్మీ - తెలంగాణ

భాగ్యలక్ష్మీ -కర్నాటక

లాడ్లీ లక్ష్మీ యోజన - మధ్యప్రదేశ్

రాజ్య లక్ష్మీ - రాజస్థాన్

లాడ్లీ పథకం - ఢిల్లీ, హర్యానా

కన్యా సురక్ష యోజన -బీహార్

కన్యా వివాహ్ పథకం - బీహర్

ప్రేమించడంలో..

తల్లిదండ్రులను ప్రేమించడంలో ఆడపిల్లలను మించిన వారు ఇంకొకరు ఉండరంటే ఎలాంటి అతిశయోక్తి లేదనే చెప్పాలి. తనకు వివాహం జరిగి అత్తారింటికి వెళ్లిపోయినా సరే.. తల్లిదండ్రుల విషయంలో జాగ్రత్తలు తీసుకోవడం తను ఎప్పటికీ మరచిపోదు. అందుకే పెద్దలు ‘కొడుకు ప్రేమ కోడలు వచ్చే వరకూ.. కూతురి ప్రేమ జీవితాంతం' అని అంటూ ఉంటారు.

ఇంట్లో ఆడపిల్ల ఉంటే..

ఏ ఇంట్లో అయినా ఒక అమ్మాయి ఉంటే చాలు.. తన తోబుట్టువులకు మరో తల్లి ఉన్నట్టే. తను తన సోదరులను చాలా జాగ్రత్తగా చూసుకుంటుంది. జీవితాంతం వారికి అవసరమైన అండను అందిస్తూ అమ్మ కాని అమ్మగా మారుతుంది.

ఇవన్నీ అబ్బాయిలు చేయలేరా.. అంటే కొందరు చేయగలరేమో కానీ.. అమ్మాయిల్లా మాత్రం చేయలేరు. ఎందుకంటే తనెప్పుడూ తల్లిదండ్రుల గురించి ఆలోచిస్తూ.. వారి మంచినే కోరుకుంటుంది కాబట్టి..!