Tops Ordered Dishes 2022: చికెన్ బిర్యానీ, మసాలా దోశ.. 2022లో ఎక్కువ మంది ఆర్డర్ చేసింది వీటినే

2022 సంవత్సరంలో స్విగ్గీలో ఎక్కువ మంది ఏమేం ఆహార పదార్థాలు ఆర్డర్ చేశారో సదరు సంస్థ వెల్లడించింది. అందులో టాప్‌లో చికెన్ బిర్యానీ, మసాలా దోశ నిలిచాయి.

Updated: Thursday, December 15, 2022, 19:05 [IST]

Tops Ordered Dishes 2022: ఫ్రెండ్‌ కలిసినప్పుడు, ఫ్యామిలీతో, బంధుమిత్రులతో రెస్టారెంట్‌కు వెళ్తే ఎక్కువ మంది ఏం ఆర్డర్ చేస్తారు.. చికెన్ బిర్యానీ. మరి టిఫిన్ సెంటర్‌కు వెళ్తే ఎక్కువ మంది ఏం తింటారు... మసాలా దోశ.

ఇదే ట్రెండ్ ఆన్‌లైన్ ఫుడ్ డెలివరీ యాప్స్‌లోనూ ఉంటుంది. యాప్ ఓపెన్ చేసి చికెన్ బిర్యానీ ఆర్డర్ చేయడమే లేదంటే మసాలా దోశ తెప్పించుకోవడమే.

2022 సంవత్సరంలో స్విగ్గీలో ఎక్కువ మంది ఏమేం ఆహార పదార్థాలు ఆర్డర్ చేశారో సదరు సంస్థ వెల్లడించింది. అందులో టాప్‌లో చికెన్ బిర్యానీ(Chicken Biryani), మసాలా దోశ(Masala Dosa) నిలిచాయి.

స్విగ్గీలో అత్యధికంగా ఆర్డర్ చేసిన వంటకంగా ఏడో సంవత్సరం కూడా చికెన్ బిర్యానీయే మొదటి స్థానంలో నిలిచింది. స్విగ్గీలో ప్రతి నిమిషానికి 137 బిర్యానీలు ఆర్డర్ చేయబడుతున్నాయి. అంటే ప్రతి సెకనుకు 2.28 బిర్యానీలు అని అర్థం.

ఇటాలియన్ రావియోలీ, కొరియన్ బిబింబాప్(రైస్ డిష్) వంటి విదేశీ రుచులు అత్యంత ప్రజాదరణ పొందిన ఆహార ఎంపికలుగా నిలిచాయని స్విగ్గీ పేర్కొంది.

చాలా మంది తమ ఆల్-టైమ్ ఫేవరెట్ అయిన గులాబ్ జామూన్‌కి అతుక్కుపోయారని కూడా డేటా చూపించింది. ఇది 27 లక్షల సార్లు ఆర్డర్ చేసిన టాప్ డెజర్ట్. 16 లక్షల ఆర్డర్లతో రసమలై, అలాగే 10 లక్షలకు పైగా ఆర్డర్లతో చోకో లావా కేక్‌లు కూడా అత్యధికంగా ఆర్డర్ చేశారని స్విగ్గీ పేర్కొంది.