వర్షాకాలం అంటే ఓ ఎమోషన్..వానని వేడుకగా మార్చే 7 ఉత్సాహభరిత పండగలు ఇవే

భారతదేశం రుతువుల భూమి. ఇక్కడ ప్రతీ రుతువుకు ఒక ప్రత్యేకమైన సాంస్కృతిక సంబరం ఉంటుంది. కానీ వాటన్నింటిలో వర్షాకాలానిది ఒక ప్రత్యేక స్థానం. పుడమికి పునరుజ్జీవాన్ని, రైతుకు పంటను, భక్తులకు దైవిక శక్తిని అందించే ఈ వానాకాలాన్ని దేశవ్యాప్తంగా వివిధ రాష్ట్రాలు ఎంతో ఘనంగా జరుపుకుంటాయి. ప్రకృతి, ఆధ్యాత్మికత, జానపద సంప్రదాయాలు, ఆనందం కలగలిసిన ఈ పండుగలు మన సంస్కృతికి అద్దం పడతాయి.

వర్షాకాలం కేవలం వాతావరణం కాదు.. అదొక భావోద్వేగం. భారతదేశం వర్షాన్ని ఒక వేడుకలా జరుపుకుంటుంది. కేరళలోని పడవ పందాల నుండి ఉత్తరాఖండ్ కొండలలోని పచ్చని పండుగల వరకు వర్షాకాలం ఒక వాతావరణంగా కాకుండా, ఒక భావోద్వేగంగా, ఒక ఆచారంగా, ప్రజలను ఏకం చేసే ఒక కారణంగా నిలుస్తుంది.

భారతదేశంలోని అత్యంత ఆకర్షణీయమైన 7 వర్షాకాలపు పండుగలు

1. తీజ్: రాజస్తాన్,బీహార్,ఉత్తర ప్రదేశ్
జులై,ఆగస్టు నెలల్లో జరిగే ఈ ఉయ్యాలల పండుగ, గోరింటాకు వేడుక, వర్షాకాలపు ప్రేమకు ప్రతీక. వివాహిత స్త్రీలు తమ భర్తల క్షేమం కోసం ఈ తీజ్ పండుగను జరుపుకుంటారు. ఆకుపచ్చని దుస్తులు ధరించి, చేతులకు గోరింటాకు పెట్టుకుని, జానపద గీతాలు పాడుతూ చెట్లకు కట్టిన ఉయ్యాలలూగుతూ వర్షాన్ని ఆహ్వానిస్తారు. జైపూర్‌ లో జరిగే గంగౌర్ తీజ్ ఊరేగింపులు చూడటానికి రెండు కళ్లూ చాలవు. తీజ్ పాటలు తరతరాలుగా స్త్రీల భావోద్వేగాలకు మౌఖిక రూపాలుగా నిలిచాయి.

నెహ్రూ ట్రోఫీ బోట్ రేస్ - కేరళ

ఆగస్టు నెలలో అలెప్పీ కాలువల్లో జరిగే బోట్ రేస్ కేవలం ఒక క్రీడ కాదు, అది నీటిపై ఎగసిపడే ఒక సాంస్కృతిక కెరటం. వర్షపు నీటితో నిండిన పున్నమడ సరస్సులో 100 అడుగుల పొడవైన సర్ప పడవల్లో వందలాది మంది తెడ్లు వేస్తూ, పాటలు పాడుతూ ఉత్సాహంగా పోటీపడతారు. ప్రతి ఏటా లక్షన్నర మందికి పైగా ప్రేక్షకులు ఈ అద్భుతాన్ని తిలకిస్తారు.

గుగ్గా నౌమి-హర్యానా,పంజాబ్

హిందూ, జానపద సంప్రదాయాల సమ్మేళనమైన ఈ పండుగను గుగ్గా పీర్ అనే జానపద దైవాన్ని గౌరవించటానికి ఆగస్టు-సెప్టెంబర్ నెలల్లో జరుపుకుంటారు. పాముకాటు నుండి రక్షిస్తాడని ఇక్కడి ప్రజల నమ్మకం. వర్షాకాలంలో పాములు ఎక్కువగా కనిపించడం వల్ల, భక్తి కూడా పెరుగుతుంది. భక్తులు పాము పుట్టల దగ్గర పసుపుతో ప్రత్యేక పూజలు చేస్తారు.

ఆడి పెరుక్కు - తమిళనాడు

తమిళ మాసమైన ఆడి 18వ రోజున జరుపుకునే ఈ పండు, వ్యవసాయానికి ఆధారమైన నదులకు కృతజ్ఞతలు తెలుపుతుంది. స్త్రీలు పూలు, అన్నం, పసుపును నదులకు సమర్పించి, సిరిసంపదలు, వర్షపు సమృద్ధి కోసం ప్రార్థిస్తారు. ముఖ్యంగా కావేరీ నది ఒడ్డున జూలై-ఆగస్టు నెలల్లో ఈ వేడుకలు ఘనంగా జరుగుతాయి. కొత్త వ్యాపారాలు, వివాహాలు ప్రారంభించడానికి ఆడి పెరుక్కును అత్యంత శుభదినంగా భావిస్తారు.

సావన్ మేళా - వారణాసి, ఉత్తర భారతం
శ్రావణ మాసంలో ప్రతి సోమవారం వారణాసి వీధులు శివ నామస్మరణతో మారుమోగుతాయి. కాషాయ వస్త్రాలు ధరించిన భక్తులు, కాళ్లకు చెప్పులు లేకుండా మైళ్ల దూరం నడిచి గంగాజలాన్ని శివుడికి అభిషేకిస్తారు. జూలై-ఆగస్టు నెలలో వారణాసికి 5 లక్షలకు పైగా యాత్రికులు వస్తారు.

హరేలా - ఉత్తరాఖండ్
ఇది నిజమైన పచ్చదనం పండుగ. విత్తనాలు నాటే కాలానికి గుర్తుగా జరుపుకుంటారు. జులై నెలలో కుటుంబాలు మొక్కలు నాటి, భూమిని పూజించి, ఇంట్లో పెంచిన మొలకలను ఆశీర్వాదంగా పంచుకుంటారు. హరేలా అంటే పచ్చదనం రోజు అని అర్థం. ఇది ఉత్తరాఖండ్ పర్వత సంస్కృతికి, పర్యావరణ పరిరక్షణకు నిదర్శనం.

బెహ్‌ దియెన్‌ ఖ్లామ్ - మేఘాలయ

ఈ ప్రత్యేకమైన ఖాసీ పండుగ వర్షాకాలపు ఆచారాలతో పాటు దుష్టశక్తులను పారద్రోలడాన్ని మిళితం చేస్తుంది. రోట్స్' అని పిలిచే అలంకరించబడిన భారీ చెక్క నిర్మాణాలను పురుషులు డప్పుల మోతలతో, వర్షపు నృత్యాలతో వరద పొలాల గుండా మోసుకెళ్తారు. వేడుక ముగింపులో బురదలో ఫుట్‌బాల్ ఆడటం ఇక్కడి ప్రత్యేకత. జూలై నెలలో ఇది జరుపుకుంటారు.

భారతదేశంలో వర్షాకాల పండుగలు ఎందుకంత ప్రత్యేకం?
ప్రతి రాష్ట్రం వర్షాన్ని సంతానోత్పత్తికి, ప్రేమకు లేదా దైవానుగ్రహానికి చిహ్నంగా భావించినా దానిని జరుపుకునే విధానం విభిన్నంగా ఉంటుంది. ఈ పండుగల సమయంలో గ్రామాలు, నగరాలు ఆచారాలు, జాతరలు, భోజనాల ద్వారా ఏకమవుతాయి. నదులు, భూమి, వర్షం అనేక పండుగలలో ప్రధాన దైవాలు.