నవంబర్ 2025లో తెలుగు రాష్ట్రాల్లో బ్యాంకు సెలవుల పూర్తి వివరాలు

ప్రతి నెలా మన ఆర్థిక ప్రణాళికలలో బ్యాంకులు కీలక పాత్ర పోషిస్తాయి. ముఖ్యమైన లావాదేవీలు, డిపాజిట్లు, రుణాల చెల్లింపులు వంటి పనుల కోసం బ్యాంకులకు వెళ్లాల్సి ఉంటుంది. అయితే పండుగలు, ప్రభుత్వ సెలవుల కారణంగా బ్యాంకులు పనిచేయని రోజులుంటాయి. కాబట్టి బ్యాంకు సెలవుల గురించి ముందుగా తెలుసుకోవడం మన పనులను సకాలంలో పూర్తి చేసుకోవడానికి, అనవసరమైన ఇబ్బందులను నివారించడానికి ఎంతగానో సహాయపడుతుంది.

నవంబర్ నెలలోకి అడుగుపెట్టబోతున్నాం. 2025 నవంబర్ నెలలో ఏపీ, తెలంగాణ రాష్ట్రాలలో పలు పండుగలు, సాధారణ వారాంతపు సెలవులు రానున్నాయి. నవంబర్ నెలలో బ్యాంకులకు మొత్తం మీద దాదాపు 9 రోజుల వరకు సెలవులు ఉండే అవకాశం ఉంది. బ్యాంకులకు సంబంధించిన పనులు ఉన్నోళ్లు ఈ సెలవులను దృష్టిలో ఉంచుకుని తమ ప్రణాళిక చేసుకోవడం చాలా ముఖ్యం.

నవంబర్ 2025లో ప్రత్యేక సెలవులు

నవంబర్ 1 (శనివారం) - ఆంధ్రప్రదేశ్ అవతరణ దినోత్సవం

ఇది ఆంధ్రప్రదేశ్ రాష్ట్రానికి మాత్రమే వర్తించే ప్రత్యేక సెలవు. ఈ రోజున ఏపీలోని అన్ని ప్రభుత్వ, ప్రైవేట్ బ్యాంకులు మూసివేయబడతాయి. అయితే తెలంగాణలోని బ్యాంకు శాఖలు యథావిధిగా పనిచేస్తాయి. ఇది మొదటి శనివారం అయినప్పటికీ రాష్ట్ర ప్రభుత్వ సెలవు దినం కావడంతో ఏపీలో బ్యాంకులు పనిచేయవు.

నవంబర్ 3 (సోమవారం) - గురునానక్ జయంతి,కార్తీక పౌర్ణమి

సిక్కుల గురువు గురునానక్ దేవ్ జయంతిని పురస్కరించుకుని ఈ సెలవును జాతీయ స్థాయిలో పాటిస్తారు. అదే రోజు హిందువులకు అత్యంత పవిత్రమైన కార్తీక పౌర్ణమి కూడా వస్తుంది. ఈ సందర్భంగా రెండు తెలుగు రాష్ట్రాల్లోని బ్యాంకులకు సెలవు ఉంటుంది.

సాధారణ వారాంతపు సెలవులు
ప్రత్యేక సెలవులతో పాటు ప్రతి నెలా వచ్చే సాధారణ వారాంతపు సెలవులు కూడా నవంబర్ నెలలో వర్తిస్తాయి.

ఆదివారాలు: నవంబర్ 2, 9, 16, 23, 30 తేదీలలో ఆదివారాలు కావడంతో బ్యాంకులు పనిచేయవు.

రెండవ శనివారం: నవంబర్ 8వ తేదీ రెండవ శనివారం సందర్భంగా బ్యాంకులకు సెలవు.

నాల్గవ శనివారం: నవంబర్ 22వ తేదీ నాల్గవ శనివారం సందర్భంగా కూడా బ్యాంకులకు సెలవు ఉంటుంది.

ఖాతాదారులకు ముఖ్య సూచనలు
నవంబర్ నెల ప్రారంభంలోనే వరుస సెలవులు వస్తున్నాయి. నవంబర్ 1 (ఏపీలో), నవంబర్ 2 (ఆదివారం), నవంబర్ 3 (సోమవారం) వరుసగా మూడు రోజులు సెలవులు రావడం గమనార్హం. నగదు విత్‌ డ్రాలు, చెక్కుల క్లియరెన్స్, డిమాండ్ డ్రాఫ్ట్‌లు (DD) వంటి పనులను అక్టోబర్ చివరి వారంలోనే పూర్తి చేసుకోవడం మంచిది