ఓనం పండుగ ఎందుకు జరుపుకుంటారు? ముఖ్య తేదీలు, ఆచారాలు

ప్రకృతి సోయగాలకు నెలవైన కేరళ.. పూల శోభతో, సంబరాల సందడితో పులకించిపోయే సమయం ఆసన్నమైంది. ప్రపంచవ్యాప్తంగా ఉన్న మలయాళీ సోదరులు అత్యంత వైభవంగా జరుపుకునే ఓనం పండుగ 2025లో కూడా అపూర్వమైన వేడుకలకు సిద్ధమవుతోంది. ప్రజా సంక్షేమమే పరమావధిగా భావించిన ధర్మనిరతుడు, చక్రవర్తి మహాబలి, తన ప్రజలను చూసేందుకు ప్రతి ఏటా భూలోకానికి తిరిగి వస్తాడన్న నమ్మకానికి ప్రతీక ఈ ఓనం. ఆయన పాలనలోని స్వర్ణయుగాన్ని స్మరించుకుంటూ, ఆనందానికి, ఐక్యతకు చిరునామాగా ఈ పండుగ నిలుస్తుంది.

పన్నెండు రోజుల పండుగ పర్వం
2025లో ఈ సంబరాలు ఆగస్టు 26న వైభవంగా ప్రారంభమై, సెప్టెంబర్ 7వ తేదీ వరకు 12 రోజుల పాటు కన్నుల పండువగా జరగనున్నాయి. ఈ పన్నెండు రోజులు కేరళలోని ప్రతి ఇల్లు సంప్రదాయ ఆచారాలు, సాంస్కృతిక కార్యక్రమాలు, రుచికరమైన విందులతో కళకళలాడుతుంది. అన్నింటికన్నా అత్యంత పవిత్రమైన, ముఖ్యమైన రోజైన తిరుఓనం సెప్టెంబర్ 5, శుక్రవారం నాడు వస్తుంది. ఈ రోజే మహాబలి ప్రతి ఇంటినీ సందర్శిస్తారని ప్రజల ప్రగాఢ విశ్వాసం.

ఓనం పండుగ ముఖ్య ఆకర్షణలు
ఓనం అంటే కేవలం ఒక పండుగ కాదు, అది కేరళ సంస్కృతికి, వారసత్వానికి జీవనాడి. ఈ వేడుకలో భాగమైన కొన్ని ముఖ్య ఘట్టాలు:

పూక్కళం: ఇంటి వాకిళ్లను రంగురంగుల పూలతో అలంకరించే ఈ పూల ముగ్గులు, మహాబలికి స్వాగతం పలికే ఆహ్వాన తోరణాలు.

ఓనం సద్య: అరిటాకుపై 26కు పైగా సంప్రదాయ వంటకాలతో వడ్డించే ఈ అద్భుతమైన విందు, ఓనం పండుగకే తలమానికం.

వల్లం కలి: కేరళ బ్యాక్‌ వాటర్స్‌లో ఉత్సాహంగా జరిగే పడవ పందాలు (స్నేక్ బోట్ రేస్) చూపరులను ఉర్రూతలూగిస్తాయి.

పులికళి: పులి వేషధారణతో కళాకారులు చేసే ఉల్లాసభరితమైన నృత్య ప్రదర్శనలు పండుగకు మరింత జోష్‌ను తెస్తాయి.

అత్తచామయం: త్రిప్పునితురలో జరిగే ఈ సాంస్కృతిక ఊరేగింపుతో ఓనం వేడుకలు అధికారికంగా మొదలవుతాయి.

ఓనం 2025 ముఖ్య తేదీలు, పంచాంగం
మలయాళ క్యాలెండర్ ప్రకారం రోజువారీ వేడుకల షెడ్యూల్

అథం-ఆగస్టు 26, 2025
చితిర-ఆగస్టు 27, 2025
చోధి-ఆగస్టు 28, 2025
చోతీ-ఆగస్టు 29, 2025
విశాఖం-ఆగస్టు 31, 2025
త్రికెట్ట-సెప్టెంబర్ 1, 2025
మూలం-సెప్టెంబర్ 2, 2025
పూరదం- సెప్టెంబర్ 3, 2025
ఉత్రాడం-సెప్టెంబర్ 4, 2025
తిరుఓనం-సెప్టెంబర్ 5, 2025
అవిట్టోమ్-సెప్టెంబర్ 6, 2025
చాతాయం-సెప్టెంబర్ 7, 2025

సెలవుల షెడ్యూల్
ఈ పండుగ ప్రాముఖ్యత దృష్ట్యా, కేరళ ప్రభుత్వం నాలుగు ప్రధాన రోజులను (ఉత్రాడం, తిరుఓనం, అవిట్టోం, చాతాయం) అధికారిక సెలవులుగా ప్రకటించింది. ఓనం కేవలం ఒక పంట కోతల పండుగే కాదు, కులమతాలకు అతీతంగా ప్రజల మధ్య ఐక్యతను, సోదరభావాన్ని పెంపొందించే ఒక గొప్ప సాంస్కృతిక వేడుక.