ఫేస్‌బుక్‌లో మీ ఫ్రెండ్స్ లిస్ట్ నుంచి తొలగించాల్సిన వ్యక్తులు

షో ఆఫ్:

మీ ఫేస్‌బుక్ ఫ్రెండ్స్ లో కొంతమంది ప్రతీ చిన్న విషయాన్నీ ఫేస్‌బుక్ ద్వారా పంచుకుంటూ వారి జీవితమంతా ఆనందమయం అన్నట్లు చూపించుకునేవారుండే ఉంటారు. వీరు తమ విశాలమైన స్నానాల గదుల దగ్గర నుంచీ, తాము సెలవలు గడపడానికి వెళ్లిన ప్రదేశం వరకూ ఏదో ఒకటి పోస్ట్ చేస్తూనే ఉంటారు. వీటన్నింటి వెనుకా ఉన్న అంతరార్ధం వారు తమ గొప్పని ప్రదర్శించడమే. ఇలాంటి వాళ్ల పోస్ట్‌లు చూసి మీరు మీకున్న జీవితం పట్ల అసంతృప్తికి గురి అవుతుంటే.. వారిని అర్జెంటుగా మీ స్నేహితుల జాబితా నుంచి తొలగించండి.

వాదించేవాళ్ళు:

మీ ఫ్రెండ్స్‌లో మరి కొంత మంది.. వారికి ఎదురైన ప్రతీ చిన్న సంఘటన మీదా వాదించేవారుండే ఉంటారు. రాజకీయాలు, మతం లాంటి సున్నిత అంశాల మీద వీరు సామాజిక మాధ్యమాలలో చర్చిస్తూ ఉంటారు. ఈ క్రమంలో వారు మాట తూలి అభ్యంతరకరమైన పదాలు వాడవచ్చు. వారి వల్ల మీరు ఇబ్బందులలో పడకముందే వారిని స్నేహితుల జాబితా నుంచి తొలగించడం ఉత్తమం.

బాస్:

మీ స్నేహితుల జాబితాలో మీ బాస్ ఉండటం అత్యంత పెద్ద తప్పు. మీరు ఆరోగ్యం బాగా లేదంటూ సిక్ లీవ్ తీసుకుని మీరేమి చేశారో లేదా మీ నైట్ అవుట్ గురించో మీ బాస్ ప్రశ్నించడం మీకు నచ్చదు కదా. ఎందుకంటే ఎంతైనా ఆమె/ఆయన మీ బాస్ మరి.

విమర్శకులు:

మన అందరి ఫ్రెండ్స్ లిస్ట్ లో ఓ విమర్శకుడు ఉండే ఉంటారు. సామాజిక మాధ్యమాలంటే కాసేపు సరదా కోసమో లేదా మీరు తీసుకున్న సరదా ఫోటోలని పంచుకోవడానికో మాత్రమే. కానీ ఈ ఫోటోలు నచ్చలేదంటూ విమర్శించే వాళ్ళని మీరు పట్టించుకోనక్కర్లేదు కానీ తక్షణమే వారిని మీ స్నేహితుల జాబితా నుండి తొలగించండి.

మీ మాజీ ప్రియుడు/ప్రియురాలు:

అవును మీరు సరిగ్గానే విన్నారు. మీ మాజీ ప్రియుడు లేదా ప్రియురాలిని మీ స్నేహితుల జాబితా నుంచి తొలగించడం హేయమైన చర్య ఏమీ కాదు. ఇది మీరు హాయిగా ఉండేందుకు దోహదపడుతుంది. మీ మాజీ ప్రియుడు లేదా ప్రియురాలు మీ స్నేహితుల జాబితాలో ఉండటం వల్ల మీకు మీ గతం గుర్తుకు రావచ్చు లేదా మీకు భవిష్యత్తులో ఏర్పడబోయే ఇతర సంబంధాల మీద ప్రభావం చూపవచ్చు. అందుకే వారిని అన్‌ఫ్రెండ్ చెయ్యండి.

ప్రౌడ్ పేరెంట్స్:

కొంతమంది తమ చిన్న పిల్లల ఫోటోలని తరచూ సామాజిక మాధ్యమాలలో పెట్టి గర్వపడుతుంటారు. అలాంటి వారిని వెంటనే వారిని అన్‌ఫ్రెండ్ చెయ్యండి. చిన్న పిల్లల ఫోటోలు చూడటానికి క్యూట్ గానే ఉంటాయి కానీ ఒక వేళ మీకు కనుక పెళ్ళయ్యి అప్పుడే పిల్లలు వద్దనుకునే వారయితే ఇలాంటి వారికి దూరంగా ఉండటం మంచిది.

పరిచయం లేని వ్యక్తులు:

మీ స్నేహితుల జాబితాలో సగం మంది కనీసం మీరెప్పుడూ కలవని వారై ఉంటారు.వారు పంపించిన ఫ్రెండ్ రిక్వెస్ట్ ని ఆమోదించి వారిని మీ స్నేహితుల జాబితాలో చేర్చుకుని ఉండవచ్చు మరియూ వీరితో చాలా అరుదుగా మాట్లాడుతుంటారు కదా??.మీకు పరిచయం లేని వ్యక్తులని వెంటనే మీ స్నేహితుల జాబితా నుండి తొలగించడం ఉత్తమం ఎందుకంటే వారి బ్యాక్ గ్రౌండ్ అదీ మీకు తెలీదు కదా.అసలు ఎప్పుడూ కలవని లేదా మాట్లాడని వ్యక్తులని ఫేస్బుక్ లో చేర్చుకుని ఏమి లాభం??