ఏ రకమైన కారు కొంటే.. మీకు లక్కీ కలిసొస్తుందో తెలుసా...

కారు కొనేటప్పుడు..

మనలో మధ్యతరగతి వారు కారు కొనే సమయంలో ఎన్నో జాగ్రత్తలు తీసుకుంటారు. ఎందుకంటే వారు తమ కలను నెరవేర్చుకోవడానికి ఎన్నో రోజుల నుండి డబ్బును ఆదా చేస్తుంటారు. కాబట్టి విలువైన కారు కొనేటప్పుడు అనేక జాగ్రత్తలు తీసుకున్నప్పటికీ, ఏవైనా పొరపాట్లు జరుగుతూ ఉంటాయి. అయితే అలా జరగకుండా ఉండకుండా ఏం చేయాలో ఇప్పుడు తెలుసుకుందాం.

కారు కలర్..

కారు కొనేటప్పుడు అది ఏ రంగులో ఉండాలనేది మీ పర్సనల్ మ్యాటర్ అయినప్పటికీ, మా జాతకానికి ఏ రంగు సరిపోతుందో.. అలాంటి రంగులోని కారును కొంటే ఇంకా బాగుంటుందని జ్యోతిష్యశాస్త్ర నిపుణులు చెబుతున్నారు. ఎందుకంటే అది మీ డేట్ ఆఫ్ బర్త్ ను బట్టి మారుతూ ఉంటుంది. కాబట్టి మీరు జ్యోతిష్య నిపుణులను సంప్రదించి మీకు ఏ రంగు సూటవుతుందో తెలుసుకుని కొంటే, మీకు చాలా ప్రయోజనకరంగా ఉంటుంది.

కారు నెంబర్..

కొందరికి కారు నెంబరు విషయంలో చాలా సెంటిమెంట్లు ఉంటాయి. ముఖ్యంగా తమ లక్కీ నంబర్ వచ్చేలా కారు నెంబరును సెలెక్ట్ చేసుకుంటూ ఉంటారు. అయితే మీ లక్కీ నెంబరును మీరు పుట్టిన తేదీని బట్టి లెక్కించాలి. ఉదాహరణకు మీరు 18వ తేదీన పుడితే (1+8=9). మీ లక్కీ నెంబర్ 9 వచ్చేలా చూసుకోవాలి. మీ కారు నెంబరు కూడా మొత్తం కలిపితే తొమ్మిది వచ్చేలా చూసుకోండి.

డెలివరీ డేట్..

మీరు కారు కొన్న తర్వాత.. దాన్ని డెలివరీ ఇచ్చే డేట్ కూడా చాలా ముఖ్యం. మీరు కారు ఇంటికి తీసుకెళ్లే రోజు మంచిదో లేదో చూసుకోవాలి. ముఖ్యంగా రాహూ కాలంలో కారు కొనకూడదు. మీ క్యాలెండర్లో మంచి రోజు చూసుకుని, కారు కొనాలి. అదే సమయంలో ఏ వస్తువు అయినా అమ్మడం లేదా కొనడం వంటివి అప్పుడే చేయాలి.

శుభ సమయం..

కారు కొనే రోజు, తేదీతో పాటు శుభ సమయం కూడా చూసుకోవాలి. ఎందుకంటే ప్రతి ఒక్కరోజు కేవలం కొన్ని గంటలు మాత్ర శుభ సమయం ఉంటుంది. రాహుకాలం, యమగండంలో కారును కొనకూడదు. కాబట్టి కేవలం శుభ ఘడియల్లో కారు కొనేలా చూసుకోవాలి.

కారులోపల..

చాలా మంది కారులోపల దేవుడికి సంబంధించిన చిన్న విగ్రహాలు పెడుతూ ఉంటారు. అయితే ప్రతి ఒక్కరూ వినాయకుని విగ్రహాన్ని మీ డ్యాష్ బోర్డుపై తప్పనిసరిగా ఉంచుకోవాలట. ఎందుకంటే విఘ్నేశ్వరుడు ప్రమాదాల నుండి మనల్ని కాపాడటానికి సహాయం చేస్తాడని చాలా మంది నమ్ముతారట.

కారు కొన్న వెంటనే..

ఎవరైతే కొత్త కారు కొంటారో.. దాన్ని వెంటనే ఫస్ట్ రైడ్ లో గుడికి తీసుకెళ్లాలట. అది కూడా ఆంజనేయుడు లేదా వినాయక గుడికి తీసుకెళ్లి పూజారితో పూజలు చేయిస్తే చాలా మంచి ఫలితం ఉంటుందట. ఈ ఇద్దరు దేవుళ్లు మన మీద చెడు ప్రభావం పడకుండా చూస్తారట.