International Daughters day 2023 : కొడుకుల కంటే కూతుళ్లే బెటర్.. ఎందుకో తెలుసా...!

ఆడపిల్లతో అల్లరి..

ఏ ఇంట్లో అయినా ఆడపిల్ల ఉంటే తను తండ్రితో కలిసి చేసే అల్లరి గురించి మీకు ప్రత్యేకంగా చెప్పాల్సిన పని లేదు. ఎందుకంటే తండ్రీకూతుళ్లు ఇద్దరూ ఎప్పుడూ ఒకే పార్టీ. ఏ పండుగైనా.. పబ్బమైనా.. శుభకార్యమైనా.. ఆమె లేకపోతే ఇల్లంతో బోసిపోతుంది.

వారిలా ఎవ్వరూ లవ్ చేయలేరు..

పేరేంట్స్ ను ప్రేమించడంలో కూతుళ్లను మించినవారు ఎవ్వరూ ఉండొరని చెప్పొచ్చు. తనకు పెళ్లి జరిగి అత్తారింటికి వెళ్లినప్పటికీ.. తల్లిదండ్రుల విషయంలో ఆమె చూపించే కేరింగ్ ఎవ్వరూ మరచిపోలేరు. అందుకే పెద్దలు ‘కొడుకు ప్రేమ కోడలు వచ్చే వరకూ.. కూతురి ప్రేమ జీవితాంతం' అంటూ ఉంటారు.

ప్రెజర్ తగ్గిపోతుంది..

ఏ ఇంట్లో అయితే కూతురు ఉంటుందో ఆ ఇంట్లో ప్రెజర్ సులభంగా తగ్గిపోతుంది. అది తండ్రికైనా.. తల్లికైనా.. ఎందుకంటే తమ గారాల పట్టితో కాసేపు సరదాగా ఆడుకుంటే చాలు ఎంతటి ప్రెజరైనా ఇట్టే తగ్గిపోతుంది. ఇతర టెన్షన్లను కూడా దూరం చేస్తుంది.

తను మంచి స్నేహితురాలిగా..

కూతురు కంటే బెస్ట్ ఫ్రెండ్ తల్లి జీవితంలో ఎవ్వరూ ఉండరని చెప్పొచ్చు. తన వయసు ఎంతైనా సరే.. కొత్త జనరేషన్ కి తగిన ఆలోచనలను ఓ తల్లి తన కూతురు నుండే నేర్చుకుంటుంది. అంతేకాదు ఓ మంచి స్నేహితురాలిగా అమ్మకు అన్ని విషయాల్లోనూ తోడుగా, నీడగా నిలుస్తుంది. సాయంలోనూ తనే ముందుంటుంది.

ఆదర్శంగా నిలుస్తుంది..

ఓ సింధు, సానియా, సైనాలా ప్రతి ఒక్క కూతురు తమ తల్లిదండ్రులను గర్వపడేలా చేయడంలో ముందుంటారు. వీరందరినీ స్ఫూర్తిగా తీసుకుని చాలా మంది అమ్మాయిలు ప్రతి దశలోనూ తమను చూసి తల్లిదండ్రులు గర్వపడేలా చేయాలని కోరుకోవడం సహజం. అంతేకాదు ఇతరులకు ఆదర్శంగా నిలిచేది కూడా కూతుళ్లే.

సరైన దారిలోనూ..

కూతురంటే అమ్మనాన్నలకు మంచి స్నేహితురాలే కాదు.. తమ తల్లిదండ్రులకు ఏవి బాగుంటాయో.. ఏవి బాగుండవో నిర్మోహమాటంగా చెప్పే ఒక క్రిటిక్ కూడా. తన నాన్నకు ఏ రంగు టీషర్ట్ బాగుంటుంది.. అందులోకి ఏ ప్యాంట్ మ్యాచ్ అవుతుంది.. అలాగే అమ్మకు ఎలాంటి సారీ సెట్ అవుతుంది.. ప్రస్తుత ట్రెండ్ కు తగ్గట్టుగా వాటిని ఎంపిక చేసి.. మిమ్మల్ని నలుగురిలో ది బెస్ట్ గా నిలబెడుతుంది కూడా. మీరు ఏదైనా తప్పు చేస్తే దాన్ని మీకు పూర్తిగా వివరించి.. మిమ్మల్ని సరైన దారిలో నడిపిస్తుంది.

ఇవన్నీ కొడుకులు చేయలేరా?

పై పనులు, విషయాలు కొడుకులు చేయలేరా.. అంటే కొందరు మాత్రం చేయొచ్చేమో కానీ.. అందరూ మాత్రం కచ్చితంగా చేయలేరు. ఎందుకంటే కూతుళ్లు ఎప్పుడూ తల్లిదండ్రుల బాగోగుల గురించి ఆలోచిస్తూ.. వారి క్షేమాన్ని కోరుకుంటారు కాబట్టి...