Dhanu Rasi Ugadi Rasi Phalalu 2022: ‘శుభకృత’ ఏడాదిలో ధనస్సు రాశి వారి జాతకం ఎలా ఉంటుందంటే...!

ఆదాయం-02, వ్యయం-08

ఈ రాశి వారికి తెలుగు నూతన సంవత్సరంలో ఆదాయం కంటే ఖర్చులు చాలా ఎక్కువగా ఉంటాయి. ఈ ఏడాదిలో ఆర్థిక పరంగా అనేక ఇబ్బందులు వస్తాయి. ఈ రాశి వారికి మూల నక్షత్రం 1,2,3,4 నాలుగు పాదాలు, పుర్వాషాడ నక్షత్రం 1, 2,3,4 నాలుగు పాదాలు, ఉత్తరాషాడ నక్షత్రం ఒకటో పాదంలో మొత్తం 9 నక్షత్ర పాదాలుంటాయి.

రాజపూజ్యం-06, అవమానం-01

ఈ ‘శుభకృత' నామ సంవత్సరంలో ఈ రాశి వారికి గురు గ్రహ ప్రభావం వల్ల 2022 ఏప్రిల్ మాసం నుండి 2023 సంవత్సరంలో మార్చి వరకు శుభ ఫలితాలొస్తాయి. విద్యార్థులకు విద్యా రంగంలో మంచి ఫలితాలొస్తాయి. స్త్రీల పేరిట కొత్త ఆస్తులను, సంపదలను పెంచుకుంటారు. మీ వైవాహిక జీవితం ఆనందంగా ఉంటుంది. ఉద్యోగులకు కార్యాలయంలో అనుకూలంగా ఉంటుంది. కొత్తగా భూములు విక్రయించేందుకు ఈ ఏడాది సమయం అనుకూలంగా ఉంటుంది.

శని ప్రభావం వల్ల..

తెలుగు నూతన సంవత్సరంలో ధనస్సు రాశి వారికి శని గ్రహం ప్రభావం వల్ల ఏప్రిల్ 2022 నుండి 2023 జనవరి 17వ తేదీ వరకు ప్రతికూల ఫలితాలు ఏర్పడొచ్చు. అవివాహితులకు వివాహ ప్రయత్నాలలో ఆటంకాలు ఏర్పడొచ్చు. మీ కుటుంబ జీవితంలో ఆటంకాలు ఏర్పడతాయి. అయితే 18 జనవరి 2023 నుండి ఈ రాశి వారికి ఏలినాటి శని దశ పూర్తవుతుంది. ఈ కాలంలో కొత్త ఆదాయ మార్గాలకు అవకాశాలు దక్కుతాయి. మీకు మానసిక ప్రశాంతత లభిస్తుంది.

రాహు ప్రభావం..

తెలుగు నూతన సంవత్సరంలో రాహూ ప్రభావం వల్ల ఆర్థిక పరంగా ప్రతికూల ఫలితాలు రావొచ్చు. మీరు సంతానం విషయంలో కొన్ని ప్రతికూల వార్తలను వినొచ్చు. మరోవైపు విద్యార్థులు విద్యపై ఆసక్తి చూపుతారు. నిరుద్యోగులకు ప్రభుత్వ ఉద్యోగం ఆలస్యమయ్యే అవకాశం ఉంటుంది. మీకు ప్రైవేట్ ఉద్యోగం లభించొచ్చు.

కేతు ప్రభావం..

ఈ రాశి వారికి తెలుగు నూతన సంవత్సరంలో కేతువు ప్రభావం వల్ల, సులభంగా ఆదాయాన్ని పొందుతారు. మీకు ఆర్థిక పరమైన విషయాల్లో ఆసక్తి పెరుగుతుంది. డబ్బు ఆదా చేయడంలో నైపుణ్యాలను పెంచుకుంటారు. మీ మాటకు ఇతరులు విలువ ఇస్తారు. మీ సలహాలు, సూచనలకు తప్పకుండా విలువ ఇస్తారు.

పరిహారాలివే..

ఈ సంవత్సరంలో మీరు ప్రతికూల ప్రభావాలను అధిగమించేందుకు పంచమ రాహువు నుండి బయటపడటానికి మంగళవారం, శనివారం రోజున దుర్గాదేవి ఆలయానికి వెళ్లి అమ్మవారికి నిమ్మకాయల మాలను లేదా ఎర్రని పువ్వులతో అంటే గులాబీ లేదా మందార పువ్వులను సమర్పించడం వల్ల మీకు దోషం నుండి విముక్తి లభిస్తుంది. గురు గ్రహం యొక్క అనుగ్రహం పొందడానికి షిరిడి సాయిబాబాను ఆరాధించాలి. అక్కడ శనగలతో తయారు చేసిన నైవేద్యాన్ని తీసుకెళ్లి అక్కడికొచ్చిన భక్తులందరికీ పంచాలి. ఇలా చేయడం వల్ల మీకు శుభ ఫలితాలు కలుగుతాయి.