సంక్రాంతి రోజు పెద్దలను ఎలా పూజించాలి? ఎలా బట్టలు సమర్పించాలి?

పుష్కరాల పుణ్యం ఇప్పుడు వస్తుంది:

ప్రతి ఒక్కరూ తమ పూర్వీకులను పూజిస్తుంటారు. అయితే ఒక్కొక్కరు ఒక్కో రోజు వారిని స్మరించుకుని పూజిస్తుంటారు. తెలంగాణలో పెత్తరమాస(పెత్ర అమావాస్య) రోజు పెద్దలను అంటే పూర్వీకులను పూజిస్తుంటారు. ఆంధ్రలో కొంత మంది సంక్రాంతి రోజున పెద్దలను పూజిస్తుంటారు.

సంక్రాంతి రోజు తద్దినం పెడుతుంటారు. పుష్కరాల వేళ పితృ దేవతలకు పిండ ప్రదానం చేసినప్పుడు ఎంత పుణ్యం వస్తుందో సంక్రాంతి రోజున వారిని పూజిస్తే అంత పుణ్యం వస్తుందని చెబుతారు.

తర్పణాలు, కుష్మాండ దానం, పితృ దేవతల పేర్లు చెప్పి పేదలకు, బ్రహ్మణులకు దానం చేయడం వల్ల పుణ్యం వస్తుంది.

పెద్దలకు దానం ఎలా చేయాలి:

పూర్వీకులు, పితృదేవలకు ఇంటి సభ్యులంతా ఒకచోటుకు చేరి చేసుకోవడం ఉత్తమం. పెద్ద కొడుకు, చిన్న కొడుకు ఒకే చోట ఉన్నప్పుడు పెద్ద కుమారుడు దానం చేయాలి. చిన్న కుమారుడు అతనికి సాయం చేయాలి. ఇద్దరూ వేర్వేరు చోట్ల ఉన్నప్పుడు ఇద్దరూ దానం చేయవచ్చని శాస్త్రం చెబుతోంది. తర్పణాలు ఎవరైనా వదలొచ్చు. పిండ ప్రదానం మాత్రం పెద్ద కొడుకు చేయాలి. వారు లేకపోయినా లేదా దూరంగా ఉన్నా వారి పేరు చెప్పి పిండప్రదానం చేయాలి.

పెద్దలకు బట్టలు దానం ఎలా చేయాలి:

పెద్దల పండగ అయిన సంక్రాంతి రోజు పెద్దలకు వస్త్ర దానం చేస్తుంటారు. వారికి సమర్పించిన దుస్తులను వారి పేరు చెప్పి బ్రాహ్మణులకు దానం చేస్తుంటారు. కొందరు పెద్దల పేరు చెప్పి ఆ కొత్త బట్టలను మరుసటి రోజు కుటుంబసభ్యుల్లో ఒకరు వేసుకుంటారు.

పెద్దల పేరు చెప్పి కొత్త బట్టలను నిరుపేదలకు దానం చేయడం కూడా మంచి ఫలితాలను ఇస్తుంది. సాయం అందుకునే వారు పేదవారై ఉండి, వారు మన దానాన్ని వాడుకోగలిగితేనే ప్రయోజనం చేకూరుతుంది.