Kumbha Rasi Ugadi Rasi Phalalu 2022 :‘శుభకృత’ ఏడాదిలో కుంభ రాశి వారి జాతకం ఎలా ఉంటుందంటే...!

ఆదాయం-09, వ్యయం-02

ఈ రాశి వారికి తెలుగు నూతన సంవత్సరంలో ఆదాయ పరంగా మంచి ఫలితాలొస్తాయి. ఖర్చులు కూడా తక్కువగా ఉంటాయి.

ఈ రాశి వారికి ధనిష్ట నక్షత్రం 3,4 రెండు పాదాలు, శతభిషం నక్షత్రం 1, 2,3,4 నాలుగు పాదాలు, ఫూర్వాభాద్ర నక్షత్రాలు 1,2,3,4 పాదాల్లో సంచారం చేస్తుంటాయి.

రాజపూజ్యం-09, అవమానం-04

ఈ ‘శుభకృత' నామ సంవత్సరంలో ఈ రాశి వారికి గురు గ్రహ ప్రభావం వల్ల ఖర్చులు పెరిగినప్పటికీ, ఆదాయం బాగా సమకూరుతుంది. విద్యార్థులకు విద్యా రంగంలో శుభ ఫలితాలొస్తాయి. అవివాహితులకు మంచి వివాహ సంబంధాలు వచ్చే అవకాశం ఉంది. సంతానం గురించి ఎదురుచూస్తున్న వారికి శుభవార్త వినిపిస్తుంది. మీకు రుణాల నుండి విముక్తి లభిస్తుంది.

శని ప్రభావం వల్ల..

తెలుగు నూతన సంవత్సరంలో కుంభ రాశి వారికి శని గ్రహం ప్రభావం వల్ల ఏప్రిల్ 2022 నుండి 2023 జనవరి 17వ తేదీ వరకు ఖర్చులు ఎక్కువయ్యే అవకాశం ఉంటుంది. ఈ కాలంలో వాహనాలు నడిపేటప్పుడు చాలా జాగ్రత్తగా ఉండాలి. ఈ రాశి వారికి ఈ ఏడాదిలో ఏలినాటి దశ కొనసాగుతుంది. కాబట్టి మీరు ఈ సంవత్సరంలో చాలా జాగ్రత్తగా ఉండాలి.

రాహు ప్రభావం..

తెలుగు నూతన సంవత్సరంలో రాహూ ప్రభావం వల్ల ఈ రాశి వారికి మిశ్రమ ఫలితాలొస్తాయి. ఎన్ని కష్టాలెదురైనా పట్టుదలతో పనులన్నీ పూర్తి చేస్తారు. వ్యాపారులకు వ్యాపార దక్షత వల్ల ధన లాభాలు ఏర్పడతాయి. ఆరోగ్య పరంగా ఈ కాలంలో మంచిగా ఉంటుంది. మరోవైపు మీ కుటుంబ సభ్యులు మీపై కొంత అశ్రద్ధ వహిస్తారు.

కేతు ప్రభావం..

ఈ రాశి వారికి తెలుగు నూతన సంవత్సరంలో కేతువు ప్రభావం వల్ల, పూర్వీకుల ఆస్తి నుండి కొన్ని ఆర్థిక లాభాలొస్తాయి. అయితే మరోవైపు తండ్రికి సంబంధించి ఆరోగ్య సమస్యలు కూడా ఏర్పడతాయి. ఉద్యోగులు కార్యాలయంలో తెలివితేటలు ప్రదర్శించి ఉన్నతాధికారుల మెప్పు పొందుతారు. ఈ కాలంలో ఆధ్యాత్మిక కార్యక్రమాలపై ఆసక్తి పెంచుకుంటారు.

పరిహారాలివే..

కుంభ రాశి వారికి ఈ ఏడాది ఏలి నాటి శని దశ కొనసాగుతోంది కాబట్టి.. పరిహారం కోసం తమిళనాడులోని తిరునల్వార్ వెళ్లి శనీశ్వరుని ఆలయానికి వెళ్లి దర్శనం చేసుకోవాలి లేదా మహారాష్ట్రలోని శనిసింగ్నాపురానికి వెళ్లి అభిషేకం నిర్వహించాలి. అదే విధంగా శ్రీకాళహస్తిలో రాహు, కేతు పూజలు జరిపించాలి. అలా వెళ్లడానికి కుదరని వారు నిత్యం గణపతిని ఆరాధన చేస్తూ.. కనకదుర్గ ఆలయానికి వెళ్లి మంగళవారం, శనివారం రోజున కుంకుమ పూజలు చేయాలి. అదే విధంగా ప్రతికూల ప్రభావాలను అధిగమించేందుకు మంగళవారం, శనివారం రోజున దుర్గాదేవి ఆలయానికి వెళ్లి అమ్మవారికి నిమ్మకాయల మాలను లేదా ఎర్రని పువ్వులతో అంటే గులాబీ లేదా మందార పువ్వులను సమర్పించడం వల్ల మీకు దోషం నుండి విముక్తి లభిస్తుంది.