Mesha Rasi Ugadi Rasi Phalalu 2022: ‘శుభకృత’ ఏడాదిలో మేష రాశి వారి జాతకం ఎలా ఉంటుందంటే...!

ఆదాయం-14, వ్యయం-14

మేష రాశి వారు ఈ కాలంలో నిరంతరం పనిలో నిమగ్నమై ఉంటారు. ఈ రాశి వారికి అశ్విని నక్షత్రం 1,2,3,4 పాదాలు, భరణి నక్షత్రం 1, 2, 3, 4 పాదాలు, క్రుతిక నక్షత్రం మొదటి పాదం.. ఇలా మొత్తం తొమ్మిది నక్షత్ర పాదాలు ఉంటాయి. ఈ సంవత్సరంలో మేషరాశి వారి ఆదాయం, వ్యయాలు సమానంగా ఉంటాయి.

రాజపూజ్యం-3, అవమానం-6

ఈ ‘శుభకృత్' నామ సంవత్సరంలో మేషరాశి ఉద్యోగులకు అనుకూలంగా ఉంటుంది. ముఖ్యంగా సూర్య భగవానుడు మూడు, ఆరో స్థానం నుండి సంచారం చేసేటప్పుడు ఉద్యోగులకు ఉన్నతాధికారుల నుండి ప్రశంసలు లభిస్తాయి. ప్రభుత్వం నుండి సహాయం లభిస్తుంది. అలాగే చాలా విషయాల్లో తల్లిదండ్రుల నుండి మద్దతు లభిస్తుంది. తెలుగు నూతన సంవత్సరంలో ఈ రాశి వారికి గౌరవం కన్నా అవమానాలు ఎక్కువగా ఉంటాయి.

గ్రహాల సంచార ప్రభావం..

ఈ సంవత్సరం బుధ, గురు, శుక్ర, కుజ, చంద్ర గ్రహాలు ఆయా స్థానాల్లో సంచారం చేసేటప్పుడు, కొత్త ఇల్లు, కొత్త వాహనం లేదా నూతన వస్తువులను కొనే యోగం లభిస్తుంది. అదేవిధంగా శుభకార్యాల్లోనూ పాల్గొంటారు. బంధుమిత్రులతో సంతోషంగా గడుపుతారు. ఇలా ఈ సంవత్సరంలో మేష రాశి వారు సానుకూల ఫలితాలను పొందుతారు.

శని గ్రహా ప్రభావం..

ఈ సంవత్సరంలో శని భగవానుడు 2022 జులై 13వ తేదీ తర్వాత మకర రాశిలో దశమ స్థానంలో సంచారం చేయడం వల్ల ఈ రాశి వారికి ప్రతికూల ఫలితాలు ఏర్పడొచ్చు. ముఖ్యంగా ఆర్థిక పరంగా కొన్ని ఇబ్బందులు ఏర్పడతాయి. అయితే ఉద్యోగ రంగంలో మాత్రం సానుకూల ఫలితాలు వస్తాయి. నిరుద్యోగులకు కొత్త ఉద్యోగం రావొచ్చు. ప్రస్తుతం ఉద్యోగం చేస్తున్నవారికి ప్రమోషన్ కూడా రావొచ్చు.

గురుడి ప్రభావం..

ఏప్రిల్ నెలలో గురుడు మీన రాశిలోకి సంచారం చేసే సమయంలో ఈరాశి వారికి ప్రతికూల ఫలితాలు రావొచ్చు. ముఖ్యంగా ఈ కాలంలో మీకు ఎక్కువ ఖర్చులు ఉండొచ్చు. విద్యా సంబంధిత రంగంలో ఖర్చులు పెరగొచ్చు. అలాగే శుభకార్యాలకు కూడా ఎక్కువ ఖర్చు చేయాల్సి వస్తుంది.

పాటించాల్సిన పరిహారాలు..

రాహువు జన్మ రాశిలో సంచారం చేస్తుండగా.. కేతువు సప్తమి స్థానంలో ఉన్న తుల రాశిలో సంచారం చేసే సమయంలో ఈ రాశి వారికి ఆశించిన ఫలితాలు రాకపోవచ్చు. మీరు చేపట్టే పనుల్లో కొన్ని ఆటంకాలు ఏర్పడొచ్చు. ఈ నేపథ్యంలో మీరు కొన్ని పరిహారాలు పాటించాలి. ముందుగా శని భగవానుడి అనుగ్రహం కోసం సుందరకాండ పారాయణం చేయాలి. శనివారం రోజున పరమేశ్వరునికి అభిషేకం చేయాలి. గురువారం రోజున సాయిబాబాను ఆరాధించాలి. అలాగే రాహు, కేతు గ్రహాల శాంతి కోసం శ్రీకాళహస్తి వెళ్లి, అక్కడ ప్రత్యేక పూజలు చేయించుకుంటే మంచి ఫలితాలొస్తాయని పండితులు చెబుతున్నారు.