Simha Rasi Ugadi Rasi Phalalu 2022: ‘శుభకృత’ ఏడాదిలో సింహ రాశి వారి జాతకం ఎలా ఉంటుందంటే...!

ఆదాయం-8, వ్యయం-14

ఈ రాశి వారికి తెలుగు నూతన సంవత్సరంలో ఆదాయం కంటే ఖర్చులు చాలా ఎక్కువగా ఉంటాయి. మఘ నక్షత్రం 1,2,3,4 నాలుగు పాదాలు లేదా పుబ్బ నక్షత్రం 1,2,3,4 నాలుగు పాదాలు, లేదా ఉత్తర నక్షత్రం ఒకటో పాదంలో మొత్తం తొమ్మిది స్థానాలు ఉంటాయి. సింహ రాశి వారికి గురు గ్రహం వల్ల ప్రతికూల ఫలితాలు ఎదురవుతాయి. మీ కుటుంబ జీవితంలో వివాదాలు రావొచ్చు. గురువు అష్టమ భాగంలో సంచారం చేయడం వల్ల వీరికి సంతానానికి సంబంధించిన సమస్యలు రావొచ్చు.

రాజపూజ్యం-1, అవమానం-9

ఈ ‘శుభకృత' నామ సంవత్సరంలో ఈ రాశి వారికి శని గ్రహ ప్రభావంతో మిశ్రమ ఫలితాలు ఏర్పడతాయి. ఈ కాలంలో మీరు ఆర్థిక పరంగా మంచి ఫలితాలను పొందుతారు. వ్యాపారులకు ఊహించిన మేరకు లాభాలు వస్తాయి. అవివాహితులకు వివాహం యొక్క సమస్యలు పరిష్కారమవుతాయి. అయితే మీ భాగస్వామికి తరచుగా ఆరోగ్య సంబంధిత సమస్యలు ఏర్పడును.

రాహు ప్రభావంతో..

మేష రాశిలో రాహువు సంచారం జరగడం వల్ల తెలుగు నూతన సంవత్సరంలో ఈ రాశి వారికి రాహువు ప్రభావం వల్ల ఆర్థిక పరంగా మంచి ఫలితాలు రావొచ్చు. భూమికి సంబంధించిన లావాదేవీలు ఆశించిన మేరకు జరుగుతుాయి. కొన్ని ఆటంకాలు ఎదురైనప్పటికీ, మీరు పట్టుదలతో వాటిని అధిగమిస్తారు.

కేతు ప్రభావం వల్ల..

ఈ కాలంలో తులరాశిలో కేతువు సంచారం చేయడం వల్ల ఈ రాశి వారికి కొత్త ఏడాదిలో శుభ ఫలితాలు వచ్చే అవకాశం ఎక్కువగా ఉంది. మీ కుటుంబ జీవితంలో సానుకూల ఫలితాలొస్తాయి. మీ సోదరుడితో అనుబంధాలు తిరిగి బలపడతాయి. రాజకీయ నాయకులకు ఊహంచిన విధంగా ఫలితాలొస్తాయి. ఆర్థిక పరంగా మంచిగా ఉంటుంది. జులై నుండి డిసెంబర్ వరకు శని మకరంలో సంచారం చేయడం వల్ల రుణ, రోగ, శత్రువుల సంబంధిత విషయాల్లో విజయం సాధిస్తారు. అయితే ఎవరికైతే వ్యక్తిగత జాతకంలో సర్పదోషం కలిగి ఉంటే వారికి మాత్రం ప్రతికూల ఫలితాలు వస్తాయి.

ప్రతికూల ఫలితాలిలా..

ఈ సంవత్సరం రవి, కుజుడు, శుక్రుడు, చంద్ర గ్రహాల సంచారం వల్ల ఉద్యోగులకు, వ్యాపారులకు శుభప్రదమైన ఫలితాలు వస్తాయి. ఈ రాశి వారికి ఈ ఏడాది ప్రతికూల ఫలితాలు ఏమైనా ఉన్నాయంటే.. మీకు గురుడి ప్రభావం ఎక్కువగా ఉంటుంది. మీ ఆలోచనలు ఏవీ పని చేయవు. ఏ ప్రయత్నంలో అయినా విఫలం అవుతూ ఉంటారు. కాబట్టి మీరు గురు గ్రహం అనుగ్రహం పొందేందుకు గురు చరిత్ర పారాయాణం చేయాలి. అంటే దత్తాత్రేయ జీవిత చరిత్రను ఏడు రోజుల పాటు చదవాలి.

పరిహారాలివే..

ఈ సంవత్సరంలో రాహువు ప్రతికూల ఫలితాలను అధిగమించేందుకు మైసూరులోని చాముండేశ్వరి దేవి గుడిలో కుంకుమ అర్చన చేయించాలి. ఇలా చేయడం వల్ల రాహువు యొక్క దోషం నుండి బయటపడొచ్చు. ఈ పరిహారాలు పాటించడం వల్ల మీకు తప్పకుండా శుభ ఫలితాలు కలుగుతాయని పండితులు చెబుతున్నారు.