Tula Rasi Ugadi Rasi Phalalu 2022:'శుభకృత'ఏడాదిలో తుల రాశి వారి జాతకం ఎలా ఉంటుందంటే...!

ఆదాయం-08, వ్యయం-08

ఈ రాశి వారికి తెలుగు నూతన సంవత్సరంలో ఆదాయం, ఖర్చులు సమనాంగా ఉంటాయి. చిత్త నక్షత్రం 3,4 పాదాలు లేదా స్వాతి నక్షత్రం 1,2,3,4 నాలుగు పాదాలు, లేదా విశాఖ నక్షత్రం 1, 2,3 పాదాల్లో అంటే మొత్తం తొమ్మిది స్థానాలు ఉంటాయి. ఈ ఏడాదిలో గురు బలం లేకపోవడం వల్ల తుల రాశి వారికి కొన్ని వ్యతిరేక ఫలితాలు వచ్చే అవకాశం ఉంది.

రాజపూజ్యం-7, అవమానం-09

ఈ ‘శుభకృత' నామ సంవత్సరంలో గౌరవం కన్నా అవమానాలు ఎక్కువగా వచ్చే అవకాశం ఉంది. గురు గ్రహ ప్రభావం వల్ల ఈ సంవత్సరంలో మీరు మిశ్రమ ఫలితాలను పొందుతారు. విద్యార్థులకు ఇతర రంగాలపై ద్రుష్టి పెరుగుతుంది. సంగీత కళాకారులకు కొన్ని సమస్యలు వచ్చును. అయితే సమస్యలు తీవ్రంగా మాత్రం ఉండవు. ఈ సంవత్సరం రవి, కుజుడు, శుక్రుడు, బుధుడు, చంద్ర గ్రహాల సంచారం వల్ల మీకు శుభ ఫలితాలొస్తాయి. మీరు కొత్త వాహనం కొనుగోలు చేయడం, కొత్త ఇంట్లోకి ప్రవేశించొచ్చు.

శని గ్రహ ప్రభావంతో..

ఈ రాశి వారికి శని గ్రహ ప్రభావంతో తెలుగు నూతన సంవత్సరంలో అద్భుతమైన ఫలితాలు వస్తాయి. మీ ఆలోచనా విధానం మెరుగవుతుంది. అయితే ఉద్యోగులకు పనిభారం పెరుగుతుంది. ఉన్నతాధికారుల కొన్ని సమస్యలొస్తాయి. ఆరోగ్య పరంగా కొన్ని ఇబ్బందులు ఎదురవుతాయి. వ్యాపారులకు ఈ కాలంలో సాధారణంగా ఉంటుంది. ఈ ఏడాదిలో తుల రాశి వారికి ఏలి నాటి శని దశ లేదు.

రాహు ప్రభావంతో..

తెలుగు నూతన సంవత్సరంలో ఈ రాశి వారికి రాహువు ప్రభావం వల్ల వైవాహిక జీవితంలో కొన్ని సమస్యలు వస్తాయి. కాబట్టి మీరు ఈ ఏడాది మీ జీవిత భాగస్వామితో చాలా జాగ్రత్తగా ఉండాలి. వారిని గౌరవంగా చూసుకోవాలి. అవివాహితుల వివాహ ప్రయత్నాలు అంత తొందరగా కుదరవు. రాహు దోష నివారణ కోసం శ్రీకాళహస్తి లేదా రామేశ్వరంలో ప్రత్యేక పూజలు చేయడం వల్ల పెళ్లి సంబంధిత సమస్యలు తొలగిపోతాయి. ఆర్థిక పరంగా ఈ కాలంలో ఎలాంటి సమస్యలు ఉండవు.

కేతు ప్రభావం వల్ల..

శుభకృత నామ సంవత్సరంలో కేతు గ్రహం ప్రభావం వల్ల ఈ రాశి వారు అనవసరమైన పనులు అంటే వీరికి సంబంధం లేని పనులు చేయాల్సి వస్తుంది. మీ ఖర్చులు కూడా పెరగొచ్చు. ఉద్యోగులకు ఆకస్మికంగా నష్టం జరగొచ్చు. వ్యాపారులకు కూడా కొంత ఇబ్బందిగా ఉంటుంది. కేతువు అనుగ్రహం పొందేందుకు ప్రతిరోజూ వినాయకుడిని ఆరాధించాలి.

పరిహారాలివే..

ఈ సంవత్సరంలో గ్రహాల అనుగ్రహం పొందేందుకు ఆవుకు నానబెట్టిన ఉలవలను బెల్లంతో కలిపి ఆహారంగా అందించాలి. ఇలా చేయడం వల్ల మీరు శుభ ఫలితాలు పొందొచ్చు. అలాగే గురు గ్రహం అనుగ్రహం పొందేందుకు ప్రతి గురువారం రోజున రాఘవేంద్ర స్వామి లేదా సాయిబాబా, దత్తాత్రేయ గురు సంబంధిత దేవాలయాలకు వెళ్లి ప్రత్యేక పూజలు చేయాలి. ఇలా చేయడం మీరు దోష నివారణ పొందొచ్చు. ఈ పరిహారాలు పాటించడం వల్ల మీకు తప్పకుండా శుభ ఫలితాలు కలుగుతాయని పండితులు చెబుతున్నారు.