హ్యుమన్ కంప్యూటర్ శకుంతల దేవి రికార్డును భానుప్రకాష్ ఎలా బద్దలు కొట్టాడంటే...!

29 మంది పోటీ..

ఆగస్టు 15వ తేదీ స్వాతంత్య్రదినోత్సవం రోజు జరిగిన ఈ పోటీలో 13 దేశాల నుండి 29 మంది ఈ పోటీలకు హాజరయ్యారు. ఇందులో ప్రపంచవ్యాప్తంగా మైండ్ స్పోర్ట్స్ సత్తా చాటినవారిని మాత్రమే దీనికి ఆహ్వానిస్తారు. అందులో మన హైదరాబాద్ కు చెందిన 20 ఏళ్ల భానుప్రకాష్ కూడా పాల్గొన్నాడు.

ఫైనల్ పోటీలో..

మన హైదరాబాదీ కుర్రోడి ప్రతి ప్రశ్నకు ఠక్కున సమాధానం చెబుతుంటే, ఆశ్చర్యపోయిన జడ్జిలు తనకు కఠినమైన ఈక్వేషన్లు, క్యూబ్ రూట్ నిచ్చి పరిష్కరించమన్నారు. దానికి కూడా మన తెలుగు కుర్రాడు వెంటనే సమాధానాలిచ్చేశాడు. అలా ప్రత్యర్థి కంటే 65 పాయింట్లు అధిక్యంతో తను ఛాంపియన్ గా నిలిచాడు.

ఫాస్టెస్ట్ హ్యుమన్ క్యాలిక్యులెటర్ గా..

ఈ సందర్భంగా భానుప్రకాష్ మాట్లాడుతూ ‘‘వరల్డ్ ఫాస్టెస్ట్ హ్యమన్ క్యాలిక్యులెటర్'గా నిలవడం ఎంతో సంతోషంగా ఉంది. మన దేశం తరపున ఈ ఛాంపియన్ షిప్ సాధించిన తొలి వ్యక్తిగా నేను నిలవడం అంటే నాకు చాలా గర్వంగా అనిపిస్తోంది' అని చెప్పాడు.

సరదాగా మొదలుపెట్టా..

వాస్తవానికి లెక్కలంటే నాకంత మక్కువ కలగడానికి కారణం.. నేను 5వ సంవత్సరంలో జరిగిన ప్రమాదం.. ఆ సమయంలో దాదాపు నేను ఒక సంవత్సరం పాటు మంచంపైనే ఉండాల్సి వచ్చింది. ఆ ఖాళీ సమయంలో బోర్ కొట్టి, సరదాగా లెక్కలు మొదలుపెట్టా. రానురాను లెక్కలపై ఆసక్తి పెరిగింది.

కొన్ని లెవెల్స్..

అప్పటి నుండి లెక్కల్ని సులువుగా, వేగంగా చేయడానికి ప్రయత్నించేవాడిని. అలా అంకెలతో నాకు అనుబంధం ఏర్పడింది. కొంతకాలానికి పోటీల్లో పాల్గొనడం ప్రారంభించాను. డిగ్రీ అయిపోయిన తర్వాత వాటిపై ఫోకస్ పెట్టాను. అబాకస్ లో 9 లెవెల్స్ పూర్తి చేశాను. మూడుసార్లు ‘ఎన్ఐపీ అకాడమీ' నిర్వహించే అబాకస్ ఛాంపియన్ షిప్ గెలుచుకున్నాను.

నా లక్ష్యం ఏంటంటే..

ప్రస్తుతం నా ముందున్న లక్ష్యం.. ఏంటంటే లెక్కలంటే చిన్నారుల్లో ఉన్న భయం పోగొట్టడం. దీని కోసం రెండేళ్ల క్రితం ‘ఎక్స్ ప్లోరింగ్ ఇన్ఫినిటీస్' అనే స్టార్టప్ ప్రారంభించాను. ‘టీశాట్ తో ఒప్పందం చేసుకుని, ప్రాజెక్టు మ్యాథ్స్' పేరిట వర్క్ షాపులు, తరగతులు నిర్వహిస్తున్నా. మా స్టార్టప్ ద్వారా ఇప్పటికే దేశవిదేశాల్లోని విద్యార్థులకు మెంటల్ ఎబిలిటీలో శిక్షణ కూడా ఇస్తున్నా. తెలుగు రాష్ట్రాల్లో మ్యాథ్స్ అర్థమెటిక్ లిటరసీ పెంచాలన్నది నా ప్రయత్నం.

నెలరోజులు కష్టపడ్డాను..

ఈ ఒలింపియాడ్ కోసం నెల రోజుల కోసం కష్టపడ్డాను. రోజుకు నాలుగు గంటల పాటు ప్రాక్టీస్ చేసే వాడిని. నాకు చిన్ననాటి లెక్కలంటే ఎంతో ఇష్టం. అందరికీ ఇది ఓ పాఠ్యాంశం కావచ్చు. కానీ నాకు మాత్రం ఓ గేమ్ లా అనిపిస్తుంది. అందుకే ఇవి విజయానికి కారణాలై ఉండొచ్చు' అని భానుప్రకాష్ మీడియాతో చెప్పాడు.