82 నిమిషాల పాటు బ్లడ్ మూన్‌..ఆకాశంలో కనువిందు చేయనున్న అద్భుత దృశ్యం!

ఆకాశం ఎన్నో అద్భుతాలకు, అంతుచిక్కని రహస్యాలకు నిలయం. అప్పుడప్పుడు మనల్ని ఆశ్చర్యపరిచే ఖగోళ విన్యాసాలు మన కళ్ల ముందు ఆవిష్కృతమవుతాయి. అలాంటి ఓ అద్భుతమైన, మరపురాని దృశ్య కావ్యం ఈ సెప్టెంబర్‌ లో మనందరినీ పలకరించబోతోంది. సెప్టెంబర్ 7,8 తేదీల రాత్రి నిండు పున్నమి నాటి చంద్రుడు నింగిలో రక్తచందన తిలకంలా మెరిసిపోనున్నాడు. దీనినే మనం బ్లడ్ మూన్ అని పిలుస్తాము. ఈ సంపూర్ణ చంద్రగ్రహణం సుమారు 82 నిమిషాల పాటు చంద్రుడిని పూర్తి ఎర్ర రంగులోకి మార్చేసి ఓ అద్భుత దృశ్యంలా మనకు దర్శనమివ్వనుంది.

చంద్రుడు ఎందుకిలా రంగు మారుతాడు?
సంపూర్ణ చంద్రగ్రహణం ఎప్పుడూ పౌర్ణమి నాడే ఏర్పడుతుంది. ఆ సమయంలో సూర్యుడు, భూమి, చంద్రుడు ఒకే సరళ రేఖపైకి వస్తాయి. సూర్యుడికి, చంద్రుడికి మధ్యగా భూమి వచ్చినప్పుడు, మన భూమి నీడ చంద్రుడిని పూర్తిగా కప్పేస్తుంది. అయితే చంద్రుడు పూర్తిగా చీకటిలో మాయమవడు.రేలీ స్కాటరింగ్ అనేది ఇక్కడ కీలక పాత్ర పోషిస్తుంది. భూమి వాతావరణం సూర్యుని నుండి వచ్చే నీలిరంగు కాంతిని వెదజల్లి, ఎరుపు రంగు కాంతిని మాత్రం వంచి చంద్రుడిపైకి ప్రసరింపజేస్తుంది. అందుకే ఆ సమయంలో చంద్రుడు అదృశ్యం కాకుండా రక్తవర్ణంలో ప్రకాశిస్తాడు.

నాసా ఏం చెబుతోంది?
అమెరికా అంతరిక్ష పరిశోధనా సంస్థ నాసా ప్రకారం, బ్లడ్ మూన్ ఎరుపు రంగు ప్రతీసారీ ఒకేలా ఉండదు. ఆ సమయంలో భూ వాతావరణంలో దుమ్ము, ధూళి, కాలుష్యం, మేఘాలు వంటివి ఎంత ఎక్కువగా ఉంటే, చంద్రుని ఎరుపు రంగు అంత గాఢంగా, ఆకర్షణీయంగా కనిపిస్తుందని శాస్త్రవేత్తలు వివరిస్తున్నారు.

ఎక్కడెక్కడ చూడవచ్చు?
ఈ అద్భుతాన్ని వీక్షించే అదృష్టం ప్రపంచ జనాభాలో దాదాపు 77% మందికి దక్కనుంది.
పూర్తిగా కనువిందు చేసే ప్రాంతాలు: ఆసియా, పశ్చిమ ఆస్ట్రేలియా
పాక్షికంగా కనిపించే చోట్లు: యూరప్, ఆఫ్రికా
భారతదేశంతో సహా ఆసియా దేశాల్లో ఈ గ్రహణం చాలా స్పష్టంగా కనిపిస్తుంది.

భారతదేశంలో గ్రహణ సమయాలు
భారతదేశంలో ఈ ఖగోళ అద్భుతం సెప్టెంబర్ 7 రాత్రి ప్రారంభమై, 8వ తేదీ ఉదయం వరకు కొనసాగుతుంది.
గ్రహణం ప్రారంభం: సెప్టెంబర్ 7, రాత్రి 8:58 గంటలకు
బ్లడ్ మూన్ గరిష్ట దశ (పూర్తి ఎరుపు రంగు): రాత్రి 11:00 నుండి 12:22 వరకు (82 నిమిషాలు)
గ్రహణం ముగింపు: సెప్టెంబర్ 8, తెల్లవారుజామున 1:25 గంటలకు

ఢిల్లీ, ముంబై, కోల్‌కతా, హైదరాబాద్, పూణే వంటి ప్రధాన నగరాలతో పాటు దేశవ్యాప్తంగా ఈ దృశ్యం అద్భుతంగా కనిపిస్తుంది. కృత్రిమ కాంతి తక్కువగా ఉండే బహిరంగ ప్రదేశాల నుండి చూస్తే అనుభూతి మరింత ప్రత్యేకంగా ఉంటుంది.

వీక్షించడానికి సులభమైన చిట్కాలు
సూర్యగ్రహణంలా కాకుండా, చంద్రగ్రహణాన్ని నేరుగా నగ్న కళ్లతో చూడటం పూర్తిగా సురక్షితం. బైనాక్యులర్లు లేదా టెలిస్కోప్‌తో చూస్తే చంద్రుడి ఉపరితలంపై ఎర్రటి ఛాయలు మరింత స్పష్టంగా కనిపిస్తాయి.