అవసరాలన్నీ అమర్చుకుంటే... ఆనందమే!

Baby

oi-Nageswara Sharma

By B N Sharma

Published: Tuesday, August 30, 2011, 11:09 [IST]

వారాంతపు సెలవులా? పిల్లలతో బయటకు వెళుతున్నారా? వారికవసరమైన వస్తువులు కొన్ని తప్పక తీసుకు వెళ్ళాలి సుమా! లేదంటే బయటకు వెళ్ళిన ఆనందం అధికంగా వుండదు. పిల్లలకు బయటకు వెళ్ళినపుడు తప్పకుండా తీసుకు వెళ్ళాల్సిన వస్తువులేమిటో చూద్దాం!
1. ఒక పెద్ద వాటర్ బాటిల్. పిల్లలకు పగటిపూట తగినంత నీరు ఇవ్వాలి. బయట దొరికే నీరు సరి అయినది కాకపోవచ్చు. కనుక తగినంత తాగు నీటిని మీరు తీసుకు వెళ్ళాలి.
2. మరో జత బట్టలు: ఆహారం తినేటపుడు లేదా ఆడుకునేటపుడు వారు వేసుకున్న దుస్తులు మురికి చేసుకుంటారు. కనుక అత్యవసరంగా వాటిని మార్చాలంటే మరో దుస్తుల జత తీసుకు వెళ్ళండి.
3. టిష్యూ పేపర్లు: టిష్యూ పేపర్లు కావలసినవాటికంటే అధికంగానే తీసుకు వెళ్ళండి. వీటితో పాటుగా ఒక తడిపిన గుడ్డ కూడా తీసుకు వెళితే, బిడ్డ ఏదేనా మురికి అంటించుకుంటే తుడిచెయ్యటానికి వీలుంటుంది.
4. మరో జత సాక్స్ - పిల్లలు కాలికి వేసుకున్న బూట్లను తీసి వేస్తుంటారు. ఈ సమయంలో మరో జత సాక్స్ కూడా అవసరం కావచ్చు.
5. తగినంత పిల్లల ఆహారం. - పిల్లలు మీ వలే ఒకేసారి కూచుని తినలేరు. కనుక రెస్టరెంటులో వారు పూర్తి ఆహారాన్ని తీసుకోలేరు. కనుక వారికవసరమైన ఆహారం తప్పక వెంట వుండి తీరాలి.
6. చిరుతిళ్ళు - పొటాటో చిప్స్ వంటివి మీకు సరిపోయినా, పిల్లాడికి ఇవ్వటానికి ఆరోగ్యకరమైన పండ్లు లేదా ఎగ్ సలాడ్ వంటివి వేరుగా ఉంచుకోండి.
7. బొమ్మలు - పిల్లలను వదిలేసి పెద్దలు వారిలో వారు మాట్లాడుకుంటూనే వుంటారు. పిల్లాడికి సమయం గడపటానికిగాను కారు, బార్బీ వంటి బొమ్మలు తీసుకు వెళ్ళండి.
8. కుషన్లు- మీ పిల్లాడు కొద్ది గంటలు ఆడితే నిద్ర పోవటానికి ప్రయత్నిస్తాడు. అటువంటపుడు చక్కటి కుషన్లు తీసుకు వెళితే ఎంతో సౌకర్యంగా వుంటుంది.
9. డైపర్లు: అదనంగా కొన్ని డైపర్లు పెట్టుకొని తరచుగా మార్చటం ఎంతో మంచిది.