బేబీ బొద్దుగా, ముద్దుగా... వుండాలంటే....!

By B N Sharma

Published: Monday, September 5, 2011, 10:33 [IST]

పుట్టిన బిడ్డకు ఒక సంవత్సరం వరకు తల్లిపాలు పట్టడం మంచిది. సుమారుగా ఆరునెలల వయసునుండి బిడ్డకు ఘన ఆహారం అందించే ప్రయత్నం చేయండి. బిడ్డ తినే ఈ ఘనఆహారం పోషక విలువలు అధికంగా కలిగినదై వుంటే బిడ్డ వేగంగా ఎదగటానికి తోడ్పడుతుంది. మొదటగా బిడ్డకు తల్లిపాలతో కూడిన అన్నం జావను అందించండి. ఘన ఆహారం యిచ్చే ముందు బేబీ కూర్చోవటం, తలతిప్పటం, నమలటం చేసే దశకు వచ్చిందా అనేది పరిశీలించాలి. తిన్నది బయటకు తేకుండా లోపలికి మింగే అలవాటు చేయాలి. ఎంత ఘనఆహారం అలవాటు చేసినప్పటికి పిల్లలు కొన్ని మాత్రమే తింటారు. కనుక పాలు మాన్పించకుండానే ఘన ఆహారాన్ని అదనంగా ఇస్తూ వుండాలి. అన్ని ఘన ఆహారాలు తల్లిపాలకు లేదా ఇతర బేబీ నియమిత ఆహారాలకు సమానం కాదనేది గమనించాలి.బిడ్డకు ఇచ్చే ఘన ఆహారాన్ని ఒక్కసారిగా మార్చేయకండి. ఓర్పుగా తినిపించాలి. కొన్ని సార్లు ఆహారం తినకుండా తల్లిపాలే కావాలని కూడా బేబీ కోరుతుంది. బేబీ ఆరోగ్యంగా వుండాలంటే తల్లిపాలు తప్పనిసరి.

ఐరన్ అధికంగా వున్న బేబీ ఆహారాలను ఇవ్వండి. ఆహారానికి పిల్లలు చాలా నెమ్మదిగా అలవాటు పడతారు కనుక అధికమొత్తంలో ఒకేసారి ఇవ్వకండి. ఆకలిని చూసి పరిమాణం పెంచండి. పండ్లు, కాయగూరలు అతి నెమ్మదిగా ఆహారంలో అలవాటు చేయండి. ఉడికించిన ఆహారం త్వరగా జీర్ణమవుతుంది. వెజిటబుల్ సూప్ పిల్లలకు మంచి పోషకాలు కల ఆహారం. పిల్లలకు ఇచుే్చటపుడు విత్తనాలు, పండ్లపై వుండే తొక్క తీసి ఇవ్వాలి.

ఆవుపాలు త్వరగా జీర్ణం కావు. కనుక బిడ్డకు ఒక సంవత్సరంలోపు ఆవుపాలు పట్టకండి. వ్యాధి నిరోధకతను పెంచే తేనెను బిడ్డకు ఒక సంవత్సరం పూర్తయిన తర్వాత ఇవ్వండి. బిడ్డకు అధిక ఆహారం ఇవ్వరాదు. చురుకుగాను ఆరోగ్యంగాను వుండాలంటే తగినంత ఆహారాన్ని మాత్రమే ఇవ్వాలి.