తండ్రి కావటం ...అంత కష్టమేం కాదు!

By B N Sharma

Published: Friday, October 21, 2011, 15:12 [IST]

తాజా చేపలు, పండ్లు, కూరలు అధికంగా తింటూ జంక్ ఫుడ్ తక్కువతినే పురుషులకు వీర్య కణాలు నాణ్యత కలిగి వుంటాయని పరిశోధకులు చెపుతున్నారు. అసలు బేబీ పుడుతుందా లేదా అనేది నిర్ణయించాలంటే తల్లితండ్రుల జీవన విధానంపై ఆధారపడి వుంటుందని స్టడీస్ చెపుతున్నాయి. శ్రమ తీసుకోని పురుషులతో పోలిస్తే, శారీరక శ్రమ బాగా చేసే పురుషుల వీర్యకణాలు అధిక చలనం కలిగి వున్నాయని తేలింది.

హార్వర్డ్ స్కూల్ ఆఫ్ పబ్లిక్ హెల్త్ లోని పరిశోధకులు 188 మంది విద్యార్ధులను రెండు గ్రూపులుగా విభజించి ఒక గ్రూపు వారికి చేపలు, పండ్లు, తాజా కూరలు, పప్పు ధాన్యాలు పెట్టారు. రెండవ గ్రూపు విద్యార్ధులకు పిజ్జా, రెడ్ లేదా ప్రాసెస్డ్ మాంసం, హై ఎనర్జీ డ్రింక్స్, స్నాక్స్ వంటివి పెట్టారు. మంచి ఆహారం తిన్న మొదటి గ్రూపు విద్యార్ధులలో వీర్యకణాలు మంచి చలనం కలిగి గర్భవతులలోని అండం వైపుగా దూసుకుపోయాయట. పిజ్జాలు, స్నాక్స్ వంటివి తినిన గ్రూపు విద్యార్ధుల వీర్యకణాలు తక్కువ చలనం కలిగి వున్నాయని వేగంగా ఎగ్ వైపుకు దూసుకుపోలేకపోయాయని తెలిసింది. పిల్లలు పుట్టాలంటే, గర్భం సహజంగా రావాలంటే వేగవంతమైన ఫలదీకరణ చాలా అవసరమని అధ్యయన కర్త అడ్రే గాస్కిన్స్ తెలిపారు.

వీర్యం సమర్ధవంతంగా వుండాలంటే సహజమైన పోషక విలువలుకల ఆహారాలు తినాలని, దానితోపాటు నడక, పరుగు, లేదా వ్యాయామాలు వంటివి చేస్తే పురుషులలోని వీర్యకణాలు మంచి చలనం కలిగి సమర్ధవంతంగా గర్భాశయంలోని అండాన్ని చేరి గర్భం ధరించటానికి కారణమవుతాయని అధ్యయనం తెలిపింది.