మీ బేబీ రాత్రుళ్ళు సరిగా నిద్రించటం లేదా?

By B N Sharma

Published: Wednesday, May 9, 2012, 10:43 [IST]

మీ బిడ్డ రాత్రివేళ నిద్రించటంలేదా? తరచుగా కొత్త తల్లులు తమ బిడ్డ రాత్రంతా నిద్రించటంలేదంటూ ఫిర్యాదులు చేస్తూ వుంటారు. ఈ రకంగా బిడ్డ రాత్రివేళ సరిగా నిద్రించకపోతే తల్లుల ఆరోగ్యం దెబ్బతింటుంది. వారికి తగినంత విశ్రాంతి ఉండదు. పగలంతా ఆమె బిడ్డ అవసరాలు తీర్చడం, తన ఇతర ఇంటిపనులు మొదలైనవాటితో శ్రమించి రాత్రుళ్ళు నిద్ర లేకుంటే అనారోగ్యంపాలు అయ్యే అవకాశం కూడా వుంటుంది. మరి బేబీ రాత్రులందు సరిగా నిద్రిస్తే కాని ఆమె కూడా నిద్రించలేదు. రాత్రులందు బేబీ బాగా నిద్రించాలంటే మీరు ఏం చేయాలి? బేబీ రాత్రులందు నిద్రించటానికి కొన్ని చిట్కాలు ఆచరించండి.

బేబీ రాత్రులందు తేలికగా నిద్రించే చిట్కాలు -
ఆహారం బాగా ఇవ్వండి - పొట్ట నిండుగా వుంటే బేబీ బాగా నిద్రిస్తుంది. కనుక బేబీ పడుకునేముందర ఆమె పొట్టనిండా ఆహారం ఉండేలా చూడండి. తల్లిపాలు తాగే పిల్లలైతే, పాలు బాగా పూర్తిగా తాగేలా చూడండి. పగటిపూట ఎక్కడ కూర్చుని పాలు పట్టినప్పటికి రాత్రులందు శబ్దాలు రాని, చీకటి ప్రదేశంలో పడుకోపెట్టి పాలు పట్టేయండి. బేబీ వెంటనే నిద్ర పోతుంది.

చిన్నపాటి పగటి నిద్ర - బేబీ రాత్రులందు అధికంగా నిద్రించాలంటే పగటిపూట పోయే నిద్ర తక్కువ చేయండి. పగటి పూట మీ ఇంటిపని మధ్యలోనే బేబీకి కొద్దిగా నిద్ర పోయేలా చేసి పాలుపడుతూ వుండండి.

బేబీ పక్కనే - బేబీకి తల్లి పక్కలో పడుకుంటే భధ్రతా భావం వుంటుంది. కనుక బేబీని రాత్రులందు మీ పక్కలోనే పడుకోపెట్టుకోండి. బిడ్డ తల్లి గుండె చప్పుడు వింటూ బాగా నిద్రిస్తుంది. బేబీ నిద్రించినప్పటికి పది లేదా పదిహేను నిమిషాలపాటు మీరు బేబీ పక్కలోనే పడుకుని ఆమెకు మంచి నిద్ర కలిగించండి.

రొటీన్ ఆచరించండి - బేబీ రాత్రులందు బాగా నిద్రించాలంటే మీరు ఆమెకు ఒక రొటీన్ ఆచరించాలి. పాలు పట్టే సమయం, నిద్రించే సమయం నిర్దిష్టంగా వుండాలి.

బెడ్ సౌకర్యం - బేబీ నిద్రించే ప్రదేశం లేదా స్ధలం శబ్దాలు లేనిదై వుండాలి. పడక మెత్తగా వుండాలి. బేబీకి వేరు దుప్పటి కప్పండి. మీరు వేరుగా దుప్పటి కప్పుకోండి. మీరు మీ బెడ్ షీటు లాగితే బేబీకి నిద్రాభంగం అవుతుంది.

ఈ చిన్నపాటి జాగ్రత్తలు తీసుకుంటే బేబీ రాత్రులందు బాగా నిద్రిస్తుంది. సాయంకాలంనుండి శబ్దాలు లేకుండా ప్రశాంతంగా వుండేలా చూడండి. శబ్దాలు కలిగించే ఆట బొమ్మల వంటివి దూరంగా వుంచండి.