చిన్న పిల్లలకు ఏ ఆహారం ఎలా?

Baby

oi-Nageswara

By B N Sharma

Published: Wednesday, March 21, 2012, 10:51 [IST]

చిన్నారులకు కొత్తగా ఘన ఆహారం మొదలు పెట్టినప్పుడు కొద్దికొద్దిగా ఇవ్వడం ప్రారంభించాలి. క్రమేణా మొత్తాన్ని పెంచుతూ పోవాలి. ఒక ఆహారాన్ని అలవాటు చేసి, కొన్ని రోజులు అదే ఆహారం ఇవ్వాలి. మరలా కొత్త ఆహారం మొదలు పెట్టాలి. ఏ ఆహారమైనా ఇష్టపడకపోతే, ఆ ఆహారాన్ని తాత్కాలికంగా నిలిపివేయండి. కొంతకాలం తర్వాత మళ్లీ మొదలు పెట్టాలి.తల్లిపాలు మాత్రమే తాగుతున్నంతకాలం చిన్నారులకు నీరు పట్టే అవసరం లేదు. అదనపు ఆహారంతో పాటే చిన్నారులకు నీరు తాగించడం మొదలు పెట్టాలి. అయితే చిన్నపిల్లలకు ఎప్పటికీ బాగా కాచి చల్లార్చిన నీరు తాగించడం మంచిది.

అదనపు ఆహారం తినిపించడం మొదలు పెట్టినప్పుడు అదనపు ఆహారంగా అన్నం, ఉడికించిన బంగాళ దుంప, నెయ్యితో మెత్తగా ఆహారం మొదలు పెడితే పిల్లలు బాగా ఇష్టపడతారు. ఈ వయస్సులో అరటిపండు బాగా ఇష్టపడతారు. గోధుమ, రాగి, బియ్యంపిండి, కందిపప్పు, నెయ్యి లేదా నూనెతో ఉడికించిన మెత్తని ఆహార పదార్థమేదైనా కూడా ఇవ్వడం మొదలు పెట్టవచ్చు.

ఆరు నుండి తొమ్మిది నెలల పిల్లలకు మెత్తని అన్నం పప్పుతో ప్రయత్నం చేయండి. ఈ వయస్సులో బాగా ఉడికించిన మెత్తని కూరగాయలు ఇవ్వవచ్చు. మెత్తని చపాతి తినిపించవచ్చు. నెయ్యి, నూనెలు ఆహారానికి కలిపితే మంచిది. తల్లిపాలు పడుతూ ఉండండి. తొమ్మిది నుండి ఒక సంవత్సరం వయసుకల పిల్లలకు ఇడ్లి, ఉప్మా, పొంగలి, మజ్జిగ, అన్నం, పాయసం, బ్రెడ్ మొదలైనవి మొదలు పెట్టవచ్చు.