పిల్లలైనా....పెద్దలైనా శక్తి పుంజుకునే నిద్ర!

Baby

oi-Nageswara

By B N Sharma

Published: Tuesday, April 3, 2012, 18:37 [IST]

ప్రతిరోజూ రాత్రివేళ గాఢంగా నిద్రిస్తే మరుసటిరోజు మీ దైనందిన కార్యక్రమాలకు, పిల్లలైతే, చక్కగా ఆడుకోటానికి తగినంత శక్తి లభిస్తుంది. వయసును బట్టి నిద్ర వస్తూంటుంది. చిన్నతనంలో ఎక్కువగంటలు నిద్రిస్తారు. పెద్దవారయ్యే కొద్ది ఆ సమయం తగ్గిపోతూంటుంది. వృద్ధాప్యం వచ్చేసరికి ఆ నిద్ర మరింత తగ్గిపోతుంది. చక్కగా నిద్రించవలసిన సమయంలో ఆరు లేదా ఏడు గంటలపాటు పడుకోవాలని నిబంధన పెట్టుకుంటాం. ముసలి వయసు వచ్చేస్తే నిద్ర రాక ఇబ్బందిపడతాం. నిద్ర ఆవశ్యకం. ఏదో ఒకరీతిలో ప్రతిరోజూ మంచి నిద్ర పోవాలి. అందుకుగాను కొన్ని చిట్కాలు చూడండి.

- ప్రతీరోజూ క్రమం తప్పకుండా తగినంత శారీరక వ్యాయామం చేయాలి. పిల్లలైతే, శరీరం అలసిపోయేలా ఆడుకోవాలి. పిల్లలను ఒక వేళకు నిద్రింపజేయాలి. అపుడే వారికి నిద్ర ప్రాధాన్యత తెలుస్తుంది.
- నిద్రకు ముందు అధికంగా ఆహారం తినరాదు. మితంగా ఆహారం తీసుకోవాలి. భోజనం చేసిన వెంటనే నిద్రపోకూడదు. నీళ్లు ఎక్కువ తాగకూడదు.
- నిద్రించేముందు కాఫీలు, టీలు, శీతలపానీయాలు తీసుకోకూడదు. మద్యపానం, ధూమపానం చేయరాదు.
- నిద్రపోయే ముందు చదవడం, టీవీ చూడడం, సెల్‌ఫోన్లు వాడడం, ఇంటర్నెట్‌ ఉపయోగించడం వంటి మానసిక శ్రమ కలిగే పనులు చేయరాదు.
- నిద్రపోయే ప్రదేశం నిశ్శబ్దంగా, చీకటిగా ఉండాలి. బెడ్‌లైటు కూడా ఉండకూడదు. నిద్రకు సహకరించే ‘మెలటోనిన్‌’ హార్మోను చీకటిలోమాత్రమే ఉత్పత్తి అవుతుంది. అందుకనే దీనిని డ్రాకులా హార్మోన్ అని కూడా పిలుస్తారు. వెలుతురు తగిలితే చాలు దీని ఉత్పత్తి ఆగిపోతుంది. ఒక వేళ పగలు నిద్రపోవాల్సి వస్తే రాత్రిపూటలాగే గదంతా చీకటిగా ఉండే వాతావరణం సృష్టించుకోవాలి.
- రాత్రవగానే మనం నిద్రపోతాం. ఆలోచనలు ఎక్కువైనా నిద్రపట్టదు. నిద్రపోవాలని కొందరు మందులు వాడుతుంటారు. బాగా పనిచేసేవారికి గాఢ నిద్రపడుతుంది. ఇంట్లో హాయిగా మెత్తని పరుపేసుకుని పడుకున్నా మనకు ఒక్కోసారి నిద్ర రాదు. కానీ, ఆరుబయట కాయకష్టం చేసుకునేవాళ్లు రోడ్డుపక్కనే కూడా పడుకుని హాయిగా నిద్రపోతుంటారు.
- కొంతమంది ఉద్యోగులు హాయిగా ఆఫీసుల్లో నిద్రపోతుంటారు. మనిషి తన జీవితకాలంలో మూడోవంతు నిద్రలోనే గడుపుతాడు. నిద్ర ప్రాథమిక అవసరమని, శారీరకపరంగా అత్యంత ముఖ్యమైంది.
- రోజంతా పనిచేయడం వల్ల కలిగే అలసట, వృత్తిపరంగాను, ఇతరత్రా మనం ఎదుర్కొనే సమస్యల కారణంగా కలిగే మానసిక ఒత్తిడి నుండి కోలుకోవడానికి నిద్ర అవసరం. ప్రతీ ఉదయం మనల్ని చక్కగా మరోమారు శక్తివంతులను చేసి ఆరోజు మన దైనందిన చర్యల కోసం ఉత్సాహంగా ఉండేలా చేసేదే నిద్ర.