బేబీల నిద్రా భంగిమలు ఎలా వుండాలి?

By B N Sharma

Published: Tuesday, February 21, 2012, 9:50 [IST]

కొత్తగా పుట్టిన బేబీల నిద్రా భంగిమలు వారి ఒక నెల వయసు నుండి ఒక సంవత్సరం వయసు వరకు సరైన రీతిలో వుండాలి. లేదంటే అవి వారి మరణాలకు కూడా దారితీస్తాయి. నిద్రా భంగిమలు సరిలేకుంటే నెలలు నిండకుండా పుట్టిన బేబీలు వివిధ శ్వాస సంబంధిత వ్యాధులకు కూడా గురవుతారు. రెస్పిరేటరీ సైనాప్టిక్ వైరస్, న్యుమోనియా, అబ్ స్ట్రక్టివ్ ఎయిర్ వే డిసీజ్ వంటివి నిద్రా భంగిమలకు సంబంధించినవే. కనుక బిడ్డ నిద్రించే భంగిమ ఊపిరితిత్తులకు తగిన ఆక్సిజన్ అందిస్తోందా అనేది పరిశీలించాలి.

పరిశోధకులు, వైద్యులు బిడ్డను సాధ్యమైనంతవరకు వెల్లకిలా పరుండబెట్టాలని చెపుతారు. బోర్లపెట్టి పొట్టపై నిద్రింపచేయరాదు. అయితే, వెల్లకిలా పడుకోబెట్టినప్పటికి తల అటూ, ఇటూ తిప్పి మారుస్తూండాలి. లేదంటే తల ఆకారం మారే ప్రమాదం కూడా వుంది.

బిడ్డ కు వేసే పక్క మెత్తగా వుండాలి. దొర్లిపోకుండా ఇరువైపులా ఎత్తుగా వుండాలి. ఈ ఎత్తు అధికంగా వుండి బిడ్డకు గాలి ఆడనిదిగా వుండరాదు. బిడ్డను ఏ రకమైన వ్యాధి సోకకుండా, వెచ్చగా నిద్రింపజేయాలంటే, పలుచటి దుప్పటి వంటి వాటిలో నాలుగు వైపులా గాలి ఆడేలా చేసి నిద్రింపజేయాలి.