చిన్నపిల్లలకు అదనపు ఆహారం

By B N Sharma

Published: Friday, March 16, 2012, 14:19 [IST]

చిన్నపిల్లలకు మొదటగా పెట్టే ఆహారం తేలికగా ఇంటిలో తయారు చేసేదిగా వుండాలి. ఇంట్లోసాధారణంగా అందరూ తినే ఆహారమే మంచిది. ప్రత్యేకంగా తయారు చేయాల్సిన పని లేదు. అయితే చిన్నపిల్లలకు పెట్టే ఆహారం బాగా ఉడికించి, మెత్తగా వుండేలా చేయాలి. కారం, పులుపు, మసాలాలు వంటివి వాటిలో ఉండరాదు. నేడు రెడీమేడ్ గా డబ్బాలలో లభించే ముందే తయారు చేసిన ప్యాకేజీ ఆహారంవల్ల ప్రత్యేక ప్రయోజనాలు ఏమీ లేవు. సహజ ఆహారాలైన అరటిపండు, మామిడిపండు రసం, తేనె వంటివి బిడ్డలకు కొద్ది కొద్దిగా తినిపించవచ్చు.

పిల్లలకు ఘన ఆహారాలు పెట్టే సమయంలో చాలామంది తల్లులు వైద్యులతో వారి పిల్లల వ్యాధుల గురించి మాట్లాడతారే కానీ, వారిని ఆరోగ్యంగా ఎలా పెంచాలి? ఎలాంటి ఆరోగ్యకర ఆహారం పెట్టాలి అనే అంశాలు మాట్లాడరు. ఇటువంటి అంశాలు, డాక్టర్లతోను, పోషకాహార నిపుణులతో కూడా చర్చించి వారి సలహా సంప్రదింపులు పొంది బిడ్డకు ఎటువంటి అనారోగ్యం కలుగకుండా చేయాలి.

మన వేడి వాతావరణంలో ఆహార పదార్థాలు అతి త్వరగా పాడయిపోతాయి. పోషక విలువలు హరించుకుపోతాయి. కనుక పిల్లలకు ఆహార పదార్థాలు ఎప్పటికీ తాజాగా పెట్టాలి. ఆహారం వండే పాత్రలు, బిడ్డ తినే గిన్నెలు శుభ్రంగా ఉంచాలి. పిల్లలకు ఆహారం పెట్టే ముందు మీరు కూడా చేతులు శుభ్రంగా కడుగుకోవాలి. పిల్లల కడుపు చిన్నగా ఉంటుంది. అందువల్ల వారు ఎక్కువ ఆహారం తినలేరు. కనుక బిడ్డ ఆరోగ్య పరిస్ధితిని బట్టి రోజుకు అయిదు లేదా ఆరు సార్లు ఆహారం పెట్టినా మంచిదే.