అప్పుడే పుట్టిన శిశు సంరక్షణ!

By B N Sharma

Published: Wednesday, January 25, 2012, 15:46 [IST]

అప్పుడే పుట్టిన శిశు సంరక్షణలో తల్లి బిడ్డకు చక్కటి ఆలింగనం ఇచ్చి తన చర్మం ద్వారా తగిన వేడిని అందించాలి. తల్లిపాలు పట్టడం చేయాలి. బేబీ ముందు భాగానికి తల్లి ఛాతీభాగానికి స్పర్శలు కలగాలి. ఎంత గాఢంగా ఈ స్పర్శ వుంటే అంత మంచిది. బిడ్డ శరీరానికి చిన్న గుడ్డ, తలకు టోపీ పెట్టాలి. పుట్టిన వెంటనే తల్లి బిడ్డకు కౌగిలి వెచ్చదనాన్నివ్వాలి. వీలైనంతవరకు ఈ స్పర్శ రాత్రి పగలు నిరంతరం కొనసాగించటం మంచిది. లేదా కొద్దిపాటి సమయంగా తరచుగా అయినా సరే బిడ్డకు ఈ వేడి కలగాలి.

తల్లి తన పాలను స్తనాలనుండి ఒత్తి బిడ్డకు నోటికి అందించినా లేక బిడ్డ తనంత తాను తాగినా పరవాలేదు. పాలు పట్టే ప్రక్రియలో కొత్తగా తల్లి అయిన మహిళ అనుభవం కలవారి ద్వారా పాలు పట్టే పద్ధతిని తెలుసుకోవాలి. తాను పక్కకు తిరిగి బిడ్డకు సౌకర్యం చేయాలి. కొద్ది పాల చుక్కలను నోటికి అందిస్తూ అలవాటు చేయాలి. నెలలు నిండకే పుట్టిన బిడ్డలకు ప్రత్యేకమైన పోషకాలు అవసరం అవుతాయి. వీరు వీలైనంత సమయం వైద్యుల పర్యవేక్షణలో ఆహారం, సంరక్షణ పొందాలి.

తల్లిని బిడ్డను వేరు చేయకుండా వారికి అవసరమైన వైద్య, మానసిక, శారీరక సంక్షేమ సహాయాలు కలిగించాలి. దీనినే కంగారూ సంరక్షణ అని కూడా అంటారు. శిశువు గర్భం నుండి బయటకు వచ్చినప్పటికి కొద్దిరోజులపాటు తల్లితో పాటే ఆమె శరీరాన్ని అంటిపెట్టుకొని ఆమె ఒడి వెచ్చదనాన్ని ఆస్వాదించాలి. బిడ్డకు కూడా తనను ఒకరు సంరక్షిస్తున్నారన్న మానసిక భావన ఏర్పడుతుంది.