చలికాలంలో బేబీ జాగ్రత్తలు ఎలా? !

Baby

oi-Nageswara

By B N Sharma

Published: Thursday, July 5, 2012, 11:50 [IST]

చలికాలంలో పెద్దలకే కాదు చిన్న పిల్లలకు కూడా శరీరమంతా నొప్పులు వస్తూంటాయి. మసాజ్ పెద్దలకే కాదు పిల్లలకు కూడా ఎంతో ఆనందం కలిగిస్తుంది. అయితే, పిల్లలకు చాలా సున్నితంగా చేయాలి. మసాజ్ చేస్తే బిడ్డ ఎంతో అలసి సొలసి నిద్రిస్తాడు. లేచిన వెంటనే మసాజ్ ప్రభావం బాగా కనపడి ఎంతో చురుకుగా కూడా వుంటాడు. సాధారణంగా, ఆయిల్ మసాజ్ స్నానం అంటే... పిల్లలు ఎంతో ఇష్టపడతారు. మసాజ్ చేసేటపుడు చెయ్యి తగిలి నోట్లోకి నూనె పోవచ్చు. కాబట్టి మసాజ్ కి వాడే ఆయిల్ నాణ్యమైందిగా ఎంచుకోవాలి. పిల్లల అవసరాల మేరకే తయారు చేసిన మసాజ్ నూనెలు మార్కెట్ లో లభ్యమవుతాయి. అది పిల్లల పరిపూర్ణ ఆరోగ్యానికి ఉపకరిస్తుంది. మసాజ్ చేయించే సమయంలో పిల్లలకి బట్టలు మార్చేటపుడు గది తలుపులు, కిటికీలు మూసి వుంచడం మంచిది. శీతాకాలంలో చలి ఎక్కువగా ఉంటుంది. కాబట్టి తగినంత ఉష్ణోగ్రత అవసరం. దీనికోసం రూమ్ హీటర్ పెట్టుకోవచ్చు.

మసాజ్ చేయించేటపుడు మరే ఇతర పనులు పెట్టుకోవద్దు. టీవీ చూస్తూ లేదా కబుర్లు చెపుతూ ఉంటే చేసే మసాజ్ పై మీరు పూర్తిగా దృష్టి పెట్టలేకపోవచ్చు. హడావుడి పడకుండా స్ధిమితంగా చేతి మునివేళ్ళతో మెత్తగా మసాజ్ చేయాలి. తర్వాత ప్రశాంత వాతావరణంలో ఊయలలో వేసి ప్రేమగా జోలపాట పాడితే పిల్లలు చాలా సేపు హాయిగా నిద్రపోతారు. తల్లితండ్రులు పిల్లల ఆరోగ్యానికి ఇది చాలా అవసరమని గ్రహించాలి. ప్రతి రోజూ మసాజ్ కు సమయం కేటాయించలేకున్నా, కనీసం వారానికొకసారి పిల్లలకు మసాజ్ చేస్తూండాలి. మసాజ్ స్నానం చేయించేటపుడు మీ చేతి గాజులు, వాచీ లేదా ఉంగరాలు, మెడలో గొలుసు వంటివి తీసేయండి. అవి గుచ్చుకుంటే పిల్లలు ఏడుస్తారు. కారణం తెలియక మనకు ఆందోళన కలుగుతుంది. పిల్లలకు మృదువుగా, మెత్తగా మసాజ్ చేస్తే చిరాకు లేకుండా సహకరిస్తారు. మెడపైన, పొట్టపైన సున్నితంగా రుద్దుతూ మసాజ్ చేస్తే పిల్లలు పేచీ పెట్టరు. పని సులువవుతుంది. వంటికి రాసిన నూనె పూర్తిగా శరీరానికి ఇంకేటంతవరకు సున్నితంగా పొట్ట, కాళ్ళు, చేతులు రుద్దండి. ఆపై బిడ్డ భరించగలిగిన మేరకు వేడిగల నీటిని వాడి స్నానం చేయించండి.

చలికాలంలో పిల్లలకు కూడా సరైన దుస్తులు కూడా ఎంతో అవసరం. ఇందుకుగాను కొన్ని చిట్కాలు చూడండి.

1. మెత్తటి కాటన్ గుడ్డలు ఎంపిక చేయండి. సింధటిక్ గుడ్డలైతే ర్యాషెస్ వస్తాయి.
2. బేబీకి కొన్న గుడ్డలు వాష్ చేసి బాగా ఎండబెట్టి తర్వాత వేయండి.
3. డ్రాయర్ వుండి శరీరమంతా ఫుల్ గా వున్న డ్రస్ బాగుంటుంది.
4. వేడి ప్రదేశాలలో మీరుంటే పలుచటి గుడ్డలు బేబీకి ధరింపచేయండి. అదనపు గుడ్డలు, టోపీలు పెట్టకండి.
5. మీరుండేది చలిప్రాంతమైతే, చేతులు, కాళ్ళు పూర్తిగా కవర్ చేసే సూటు వేయండి. చలికాలంలో కాటన్ సాక్స్ వేస్తే, టోపీ పెడితే బేబీకి సౌకర్యంగా వుంటుంది.
6. ఫ్రంట్ లో బటన్లు వుండే దుస్తులు బేబీకి వేయటానికి తీయటానికి బాగుంటాయి. ఎలాస్టిక్ వున్న దుస్తులు వాడకండి.
7. బేబీకి డైపర్లు ప్రధానం. దీనికి గాను క్లాత్ మాత్రమే వాడండి. ఉపయోగించిన వెంటనే వాటిని తీసేయండి. ఈ జాగ్రత్తలు తీసుకుంటే బిడ్డలు చలికాలంలో కూడా ఆరోగ్యంగా, ఆనందంగా ఉంటారు.