సురక్షిత గర్భ నిరోధక సాధనాలు...!

By B N Sharma

Published: Tuesday, March 13, 2012, 11:39 [IST]

కొత్తగా పెళ్ళైన జంటలు కొంతకాలం పిల్లలు పుట్టకుండా వేచి వుండాలనుకుంటారు. లేదా ఒక బిడ్డకు జన్మనిచ్చిన తల్లితండ్రులు మరో బిడ్డ పుట్టటానికి కొంత సమయం వేచి వుండాలనుకుంటారు. బిడ్డ బిడ్డకు మధ్య కనీసం రెండు లేదా మూడు సంవత్సరాల గ్యాప్ వుంటే తల్లి కూడా ఆరోగ్యంగా వుంటుంది. ఇటువంటి పరిస్ధితుల కొరకు సాధారణంగా ఫ్యామిలీ ప్లానింగ్ ఆచరించాలి. ఫ్యామిలీ ప్లానింగ్ ఆచరణలో వాడే గర్భనిరోధక సాధనాలలో ఇంట్రా యుటెరిన్ కాంట్రాసెప్టవ్ డివైజ్ ప్రధానమైంది. దీనినే కాపర్ టీ లేదా లూప్ అని కూడా వ్యవహరిస్తారు.

మహిళలు కాపర్ టి వేయించుకోవడం వలన దాదాపు పది సంవత్సరాల వరకు ప్రెగ్నెంట్ అవకుండా వుండవచ్చు. కాపర్టీలో నేడు ఎన్నో రకాలు ఉన్నాయి. వీటిలో మెడికేటెడ్‌, మల్టీలోడ్‌, హార్మోన్‌ రిలీజ్‌ రకాలు నేడు అందుబాటులో ఉన్నాయి. మహిళ తాను గర్భం ధరించాలని కోరితే, తాను వేయించుకున్న కాపర్ టి ని తొలగిస్తే చాలు ఆమెకు ప్రెగ్నెన్సీ సులభంగా వచ్చేస్తుంది. ఇది ఫెయిల్ అయ్యే అవకాశాలు చాలా తక్కువ. దీనిని వేయించుకోడానికి అధికంగా వ్యయం చేయవలసిన అవసరం కూడా లేదు. ఒకసారి వేస్తే లోపలే వుంటుంది కాబట్టి టాబ్లెట్ల అవసరం కూడా వుండదు.

అయితే, దీనిని వేయించుకోడానికి అనుభవజ్ఞులైన వైద్యుల అవసరం వుంటుంది. సైడ్ ఎఫెక్ట్స్ చాలా తక్కువ. దీనిని ఒక ప్రసవం తర్వాత ఒకటిన్నర నెలకు, సిజేరియన్ అయితే, మూడు నెలల తర్వాత వేయించుకోవాలి. పిరీయడ్ వచ్చిన తర్వాత 5 రోజుల నుండి 8 రోజుల లోపు దీనిని వేయించుకోవాలి. దీనిని మహిళ గర్భాశయంలో అమరుస్తారు. దీనిని వేసిన తర్వాత మహిళ ప్రతి ఆరు నెలలకు ఒకసారి డాక్టర్ కు చూపించుకొని ఇన్ఫెక్షన్ వంటివి లేకుండా చూసుకోవాలి.