పిల్లలు చెడుగా ప్రవర్తిస్తుంటే...!

1. ఒక్కో సారి మీ పిల్లాడు చేసే పని హాని కలిగించకపోతే వాడు చేసేదానిని నిర్లక్ష్యం చేయండి. చేసి చేసి వాడే ఆ పని మానేస్తాడు. మీరు కనుక గట్టిగా మందలిస్తూ వుంటే వాడు మరింత మొండికెత్తుతాడు.

2. పిల్లలను క్రమశిక్షణలో వుంచాలంటే అరుపులు, కేకలు పెట్టి ప్రయోజనం లేదు. మెల్లగా వాడిని మాయ చేయాలి. మీరు చెప్పింది వినకపోతే, వాడి దృష్టి మరల్చండి. మీరు చూపే ప్రేమ, శ్రద్ధలు వాడిని మంచి పిల్లాడిగా తయారు చేస్తాయి.

3. పిల్లల చెడు ప్రవర్తన కళ్ళతోను, పెదవులతోను, ముఖ కవళికలతో నియంత్రణ చేయవచ్చు. తల్లికి బిడ్డకు మధ్య గల టెలిపతి ప్రయోగం బాగా పని చేస్తుంది.

4. చెడు ప్రవర్తనకు పిల్లలను కొడితే వారు మరింత దురుసుగాను, మొండిగాను, కోపంగాను తయారవుతారు. పిల్లాడు తల్లి ఒడిలో దగ్గరగా వున్నపుడు భుజం తడుతూ లేదా ముద్దులాడుతూ చెపితే క్రమశిక్షణలో వుంటాడు.

5. నేటి తరం పిల్లలు, చాలా తెలివికలవారు. ఒకసారి మీరు వారి తప్పులను ఎత్తి చూపితే సరిదిద్దుకుంటారు. వాడిచేతికి ఒక చీపురు ఇచ్చి వాడు పాడు చేసిందంతా తుడవమంటే చాలు, చీపురుతో తుడవటంలో వున్న కష్టం వాడికి అర్ధమైపోతుంది.