మగబిడ్డను సగర్వంగా పెంచండి!

By B N Sharma

Published: Friday, October 28, 2011, 11:08 [IST]

ఒక మగ పిల్లాడిని క్రమశిక్షణతో స్వతంత్రంగా వ్యవహరించేలా పెంచడం కష్టమైన పని. తల్లి తండ్రులకు పూర్తి వినయ విధేయతలు చూపని నేటి రోజులలో పిల్లల పెంపకం చాలా ప్రధానమైంది. పిల్లల పెంపకానికి ఖచ్చితమైన నిబంధనలంటూ లేవు. ప్రతి తల్లి తండ్రులూ వారి పిల్లలను వారి కనుగుణంగాపెంచాల్సినప్పటికి, మగ, ఆడ పిల్లల మధ్య పెంపకంలో కొంత వ్యత్యాసముంటుంది. కనుక ఇంటిలో మగ పిల్లవాడిని ఎలా పెంచాలనేది పరిశీలిద్దాం.

సాధారణంగా పిల్లలకు 10 సంవత్సరాలు వచ్చేటంతవరకు ఆడైనా, మగైనా పెంపకం తీరు ఒకటిగానే వుంటుంది. ఏదైనా తేడా వుంటే బహుశ అది వారి ఆటబొమ్మలలో కావచ్చు. 13 లేదా 14 సంవత్సరాలు వచ్చాయంటే, ఇక మగ పిల్లాడు యౌవన దశకు చేరతాడు. ఇక అప్పటినుండి పిల్లాడిని విభిన్నంగా వ్యవహరించాల్సివుంటుంది. పిల్లలు మగవారవటంచేత వీరి శారీరక కదలికలు అధికంగా వుంటాయి. వీరు బయట ఆటలాడటం, దెబ్బలు తగిలించుకోడం వంటివి కూడా చేస్తారు. అంతమాత్రం చేత వీరిని నిరుత్సాహపరచరాదు. కాని సన్నిహితంగా పరిశీలించాలి.

ఆటలాడితే పరవాలేదు. కాని అదే సమయంలో వారు చదువు మానరాదు. అయితే, వారు ఏ విషయంలోనైనా దురుసుగా లేదా హింసాత్మకంగా ప్రవర్తిస్తుంటే మాన్పించాల్సిందే. పిల్లాడు పోట్లాడుతుంటే దానిని సరిచేయాల్సిందే. కొంతమంది తల్లి తండ్రులు తమ కుమారుడి దురుసు ప్రవర్తనను గొప్పతనంగా భావిస్తారు. అది వారిని కాపాడుతుందనుకుంటారు. అయితే ఆ ప్రవర్తన అతను ప్రతి ఒక్కరిపైనా ప్రదర్శిస్తాడని, చివరకు తమపై కూడా ఏదో ఒకనాడు చూపుతాడని భావించరు. కనుక బయట మీ పిల్లలు దురుసుగా ప్రవర్తిస్తుంటే అది మాన్పించండి.

ప్రతి కుటుంబంలోను పిల్లవాడిని తండ్రి క్రమశిక్షణ చేస్తే, తల్లి పిల్లాడిని స్నేహితుడుగాను, తల్లి కట్టడి చేస్తే తండ్రి పిల్లాడిని స్నేహితుడుగాను చూడాలి. మగపిల్లలు తల్లికి సన్నిహితంగా వుంటారు. కనుక తల్లి కఠినంగా వుండి తండ్రి తేలికగా వుండాలి. పిల్లల్ని బాగాపెంచాలంటే ఇది మంచి పద్ధతి. ఎదిగే మగ పిల్లలకు అపుడపుడూ శారీరకంగా కొన్ని శిక్షలు కూడా వేయాల్సిందే. అనేది పాతకాలంనాటిమాట. కాని నేడు వీరి క్రమశిక్షణకు చిట్కాలు మారాయి. మీరు కనుక పిల్లవాడిని కొడితే, అతను నేటి రోజుల్లో మరింత మొండిగాను, దురుసుగాను తయారవుతున్నాడు. ఒక దశ తర్వాత అతనికి భయం కలగటం లేదు. అతనికి ఏ శిక్ష వేసినా అతను గాయపడకుండా అవమానిస్తే చాలు. అదే మీ చేతుల్లో వున్న ఆయుధం. దానితోనే అతను తన తప్పును గ్రహించే స్ధితికి వస్తాడు.

గర్వంగా భావించే మీ కుమారుడిని పెంచటానికి ఈ చిట్కాలుపయోగించండి.