అంబరాన్నంటే సంబరాల దీపావళి!

By B N Sharma

Published: Friday, October 14, 2011, 17:12 [IST]

దీపావళి సంబురాలంటే....దివ్వెల వెలుగులు, కొత్త బట్టలు, పూజలు, తీపి ఆహారాలు, ఇంటి అలంకరణలు, టపాసుల కొనుగోలు మొదలైనవన్ని పిల్లలకు ఎంతో ఉత్సాహాన్నిస్తాయి. ఎంత ఆనందంగా వున్నప్పటికి కుటుంబంలోని పెద్దలు తమ పిల్లల భధ్రతకై ఆరాటపడుతూనే వుంటారు. ఎన్ని జాగ్రత్తలు తీసుకున్నప్పటికి ప్రతి సంవత్సరం విషాద సంఘటనలు వింటూనే వుంటాం. అయితే, దిగువ పేర్కొంటున్న మా జాగ్రత్తలను పాటించి ఈ సంవత్సర దీపావళి సురక్షితంగాను, ఆనందంగాను జరుపుకోండి.

1. పిల్లలు అందమైన డ్రస్ లు వేసుకుంటే అందరికి ఆనందమే. అయితే ఆ ఆనందం అలానే వుండాలంటే, కొన్ని జాగ్రత్తలు తీసుకోవాలి. పాలీయస్టర్, సిల్క్ మొదలైనవి తేలికగా మంటలను అందుకుంటాయి. అందుకని ఈ పండుగకు వారికి మరో జత కాటన్ దుస్తులు కొనండి. సాయంత్రమయ్యే సరికి టపాసులు కాల్చటానికి సిద్ధమయ్యే పిల్లలకు కాటన్ దుస్తులు వేస్తే వారు వెలిగించే ఫైర్ వర్క్స్ తో మీకు ఎటువంటి సమస్యా రాదు.

2. పిల్లలకు పొడవైనవి, బాగా లూజుగా వుండే దుస్తులు వేయవద్దు. టపాసులు కాల్చటం కష్టం కూడా అవుతుంది. పూజ సమయంలో ఏ దుస్తులు ధరించినప్పటికి, సాయంత్రమయ్యే సరికి బిగువుగా వుంటే ప్యాంటు, షర్టు వంటివి వేయండి. వీటితో పిల్లలు టపాసులు కాల్చటం తేలికవుతుంది.

3. పిల్లలకు అన్ని రకాల టపాసులు ఇవ్వవద్దు. ప్రత్యేకించి పేలే టటువంటి టపాకాయలు వారికి సురక్షితం కాదు. అందుకని స్పార్క్ లర్స్ మాత్రమే ఇచ్చి వారిని ఆనందింపజేయండి. వారు ఒంటిరిగా కాల్చకుండా పెద్దవారి సమక్షంలో కాల్చేలా చేయండి. టపాసులు నాణ్యతగలవిగా ఎంపిక చేసి లైసెన్సులు కల డీలర్ల వద్ద మాత్రమే కొనండి.

4. పిల్లలకు టపాకాయలు చూస్తే ఎంతో ఉత్సాహం. ఈ ఉత్సాహంలో జాగ్రత్తలు మరచిపోతారు. కనుక ప్రతి టపాకాయను ఎలా పేల్చాలో వారికి తెలియజేయండి.

5. టపాసులు కాల్చే ప్రదేశం కూడా సరైనదై వుండాలి. రోడ్డు మధ్యలో లేదా ఇంటి లోపల, గుంపులు వున్న చోట కాల్చవద్దని పిల్లలకు తెలియజెప్పాలి.

ఈ జాగ్రత్తలను పాటించి దీపావళి పండుగను హాయిగా, ఆనందంగా జరుపుకోండి.