వయసొచ్చిన పిల్లలు-దిక్కుతోచని తల్లితండ్రులు!

By B N Sharma

Published: Friday, March 16, 2012, 11:00 [IST]

సాధారణంగా ఎవరికైనా సరే యుక్తవయసు చాలా సున్నితంగా వుండి వ్యవహరించటం కష్టమవుతుంది. ఎందుకంటే టీనేజ్ లో అపుడపుడే వారికి వ్యక్తిత్వానికి గుర్తింపు వస్తూంటుంది. శారీరకంగా, మానసికంగా మార్పులు రావటం గమనిస్తారు. వారి శారీరక పరిస్ధితిపై అవగాహన ఏర్పడుతుంది. ఒత్తిడిగా వుంటుంది. పిల్ల లేదా పిల్లవాడిలో వచ్చే ఈ టీనేజ్ మార్పులు తల్లితండ్రులకు కూడా ఆందోళన కలిగిస్తాయి. సరిగ్గా ఈ సమయంలోనే పిల్లలతో సంభాషించడం ఎంతో ప్రధానం. రాబోయే సంవత్సరాలలో తల్లితండ్రులకు, పిల్లలకు మధ్య మంచి అవగాహన ఏర్పడాలంటే ఈ వయసులో సంభాషణలు ప్రాధాన్యం వహిస్తాయి.

అందుకుగాను తల్లితండ్రులు పిల్లలతో వారి స్నేహితులతో కొంత సమయం గడపాలి. అయితే సరదా కబుర్లు, బయటి కాలక్షేపాలు, సినిమాలు చూడటం, తినడం, షాపింగ్ లేదా కొనుగోళ్ళు, అందరూ కలసి కనీసం రోజులో ఒక సారి భోజనం చేయడం వంటివి చేయాలి. ఇదంతా వారిలో ఏం జరుగుతోందనేది తెలుసుకోడానికి వారితో ఒక బంధం ఏర్పరచుకోడానికి ఉపయోగిస్తుంది. సహనం వహించండి. ఏదేనా తప్పు జరిగిందా, కేకలు పెట్టకుండా అతని అభిప్రాయం ఏమిటో, ఎందుకలా చేశాడో తెలుసుకోండి. అతని అవసరానికి మీరు ఎప్పటికి సహాయంగా వుంటారన్న భావం వారికిఏర్పరచండి.

ఈ వయసులో తల్లితండ్రులు సాధారణంగా పిల్లలపై రహస్య పరిశీలన చేస్తారు. అది సరికాదు. టీనేజ్ పిల్లలు కూడా పెద్దలవంటి వారే. వారికి కొంత వ్యక్తిగత ప్రయివసీ అవసరం. మీరు రహస్య పరిశీలన చేస్తున్నారని తెలిస్తే మీ పట్ల వారి మనోభావాలు మారిపోతాయి. కనుక తల్లితండ్రులు పిల్లలనే నేరుగా అడిగి విషయాలు తెలుసుకోవాలి. వారికి కొన్ని హద్దులున్నాయని తెలుపుతూ వాటిని నిర్ణయించి అమలు చేయాలి.