మలబద్ధకం సమస్య నివారించటం ఎలా?

Kids

oi-Nageswara

By B N Sharma

Published: Tuesday, June 26, 2012, 12:30 [IST]

మలబద్ధకం సాధారణ సమస్య. పిల్లల విషయంలో ఇది మరీ అధికం. వారానికి మూడు సార్లుకూడా వెళ్ళని వారుంటారు. వీరికి వచ్చే మలం చాలా గట్టిగా వుండి, ఎండిపోయి, అసాధారణంగా పెద్దదిగా వుంటుంది. అందుకని విసర్జన కూడా వారికి కష్టం అయిపోతుంది. అయితే, ఈ మలం ఎప్పటికపుడు బయటకు పోతూ వుంటే, ఈ సమస్య వుండదు. అది నిలువ వుంటేనే గట్టిపడుతుంది. మలబద్ధకం రోగం కాకపోయినా రోగాలను కలిగిస్తుంది. చాలా సార్లు వీటిని నివారించుకోవచ్చు. ఆరోగ్యకరమైన తిండ్లు, వ్యాయామాలు, వీటికి పరిష్కారం.

చాలాసార్లు, తగినంత నీరు లేని ఆహారాలు తిన్నపుడు, మలబద్ధకం ఏర్పడుతుంది.తినే ఆహారంలో పీచులేనపుడు కూడా సమస్యగానే వుంటుంది. పీచు లేనందువలన తగినంత కదలికలు లేకుంటే, మలం బయటకు జారదు. పిల్లలు సాధారణంగా కొవ్వులు అధికంగా వుండే ఫాస్ట్ ఫుడ్స్ తింటారు (బర్జర్లు, పిజ్జాలు, మిల్క్ షేక్ లు, ఫ్రైలు )వీటిలో పీచు వుండదు. ప్రోసెస్ చేసిన కేండీలు, కుక్కీలు, కూల్ డ్రింక్ లు కూడా పీచు లేక హానికరంగా వుంటాయి. కొన్ని మార్లు పిల్లలలో ఐరన్ లోపం కొరకు వేసే మందులు కూడా మలబద్ధకం కలిగిస్తాయి. పిల్లలు తల్లిపాలనుండి గేదె పాలకు మారేముందు లేదా ఒక ఆహారంనుండి మరో ఆహారంకు మారే సమయంలో కూడా పిల్లలకు మలబద్ధకం ఏర్పడుతుంది.

కొంతమంది పిల్లలు వారికి అవసరం వున్నా బాత్ రూమ్ కు వెళ్ళకుండా మానేస్తారు.ఆటలు ఆడుతూ, లేదా రెస్ట్ రూమ్ దూరంగా వుండి లేదా ఇతర కారణాలుగా వీరు బద్ధకిస్తూ వుంటారు. కనుక పెద్దవారు వీరిని తరచుగా అడుగుతూ బాత్ రూమ్ కు వెళ్ళమని చెప్పాలి. ఈ రకంగా అశ్రద్ధ చేస్తే, తర్వాతి దశలో మలం త్వరగా బయటకు రాదు. ఒత్తిడి కూడా మలబద్ధకాన్నిస్తుంది. స్కూల్, స్టడీస్ వంటి వాటితో వీరు ఒత్తిడి కలిగివుంటారు. కొవ్వు అధికంగా వుండే ఆహారాలు, మసాలా ఆహారాలు వీరిలో మలబద్ధకాన్ని కలిగిస్తాయి. కొన్ని సార్లు జబ్బుల కారణంగా లేదా మందుల కారణంగా కూడా పిల్లలకు మలబద్ధకం సమస్య వస్తుంది.

మలబద్ధక నివారణకు ఏం చేయాలి?
పిల్లలకు తగినంత ద్రవాహారాలు ఇవ్వండి.తగినంత నీరు తాగడం, ద్రవాహారాలు సమస్యను పరిష్కరిస్తాయి. పీచు అధికంగా వుండే ఆహారాలు, పండ్లు, కూరలు, గింజలు వంటివి తినిపించండి. తీపి వస్తువులు తినటం తగ్గించమనండి. పిల్లలతో తగినంత వ్యాయామం, ఆట పాటలు వంటి శారీరక శ్రమ కల్పించండి. ప్రతిరోజు ఆహారం నియమానుసారం ఒకవేళకు ఇవ్వండి. అన్నిటికి మించి పిల్లలకు మలవిసర్జనకు ప్రతిరోజూ ఒక సమయానికి వెళ్ళే అలవాటు చేయాలి. పిల్లలకు మలబద్ధక నివారణకు ఇచ్చే మందులు వైద్య సలహా మేరకే వాడండి.

ఈ చిన్నపాటి పరిష్కారాలు మీ పిల్లవాడిలో మలబద్ధకాన్ని పోగొట్టి ఆరోగ్యంగా వుండేలా చేస్తాయి.