పిల్లలు తప్పులు చేస్తే సరిదిద్దటమెలా?

ముఖ్యంగా మూడేళ్ల వయస్సులో పిల్లల్ని తరచుగా కొడుతుంటే ఎదిగేకొద్దీ వారిలో దురుసు ప్రవర్తన ప్రబలుతుంది. మొండితనం అధికమవుతుంది. మరీ చిన్నతనంలో కనుక పిల్లల్ని కొట్టినట్లయితే వారికి మూడేళ్ల వయస్సు వచ్చేసరికి దెబ్బలు తినని పిల్లలతో పోల్చితే జ్ఞాపకశక్తి క్షీణించే అవకాశం కూడా వుందని పరిశోధకులు వెల్లడిస్తున్నారు.

అయితే దురుసుగా వ్యవహరించే పిల్లలంతా చిన్నతనంలో ఏదో ఒక సందర్భంలో బాగా దెబ్బలు తిన్నవారేనని అంచనా వేయకూడదు. దురుసుతనానికి ఇదో కారణం. హింసాత్మక ధోరణితో వ్యవహరించడాన్ని తాము తిన్న దెబ్బలు ప్రభావితం చేస్తాయన్నది పిల్లల నిపుణుల అభిప్రాయం.
ఎంత విసిగించినా చెయ్యి ఎత్త వద్దని ఆంక్షలు పెట్టుకోవడం ఆచరణలో కొంచెం కష్టమే కానీ, వీలైనంతవరకు నియత్రణ చేసుకోవడమే మంచిది. లేకుంటే పిల్లలు ప్రేమపూర్వకమైన తల్లితండ్రుల పట్ల అయిష్టాన్ని పెంచుకొని మరింత దురుసుగా ప్రవర్తించటమేకాక, తమ తమ కెరీర్లు సైతం పాడుచేసుకునే అవకాశాలున్నాయి.