తాగేయ్ కొద్దిగా....రెచ్చిపో జోరుగా!

Kids

oi-Nageswara

By B N Sharma

Published: Wednesday, June 27, 2012, 16:16 [IST]

పసిబిడ్డగా వున్నపుడే పెద్దలు పిల్లలకు కూల్ డ్రింకులు, ఐస్ క్రీములు అలవాటు చేస్తారు. ఆ పసివాడు తింటూ వుంటే, వీరే ఎంతో ఆనందించేస్తారు. వాడికి పది లేదా పన్నెండు సంవత్సరాల వయసు వచ్చే సరికి, పెద్దలకు తెలియకుండానే పాకెట్ మనీలతో తనంతటతాను కూల్ డ్రింకులు తాగేస్తూంటాడు. ఈ రకంగా టీనేజ్ దశకు వచ్చే సరికి పిల్లలు వారానికి అయిదు లేదా ఆరు నురగలు కక్కే కూల్ డ్రింక్ లు రెగ్యులర్ గా తాగేస్తూవుంటే వారిలో హింసాత్మక ధోరణి, దూకుడు ప్రవర్తన అధికమవుతుందని ఒక తాజా స్టడీ వెల్లడించింది.

వారు ఎంత హింసకు దిగుతారంటే, అది కర్ర కావచ్చు లేదా దొరికితే పిస్టల్ కావచ్చు...ఒక ఆయుధాన్ని చేతబట్టి తమ సహచరులు, లేదా ఇతర చిన్నవయసు వారిపై హింసకు దిగుతారట. వీరు వారానికి ఎన్ని కార్బోనేటెడ్ కూల్ డ్రింక్ లు తాగుతున్నారో రీసెర్చర్లు పరిశీలించారు. వారి దైనందిన ప్రవర్తన, హావభావాలు పరిశీలించారు. మెల్లగా వారిలో హింసాత్మక ధోరణి, భావాలు అధికమవుతుండడాన్ని కనిపెట్టారు. ప్రతివారం అయిదు లేదా అంతకంటే అధికంగా కూల్ డ్రింక్ కేన్లు తాగేసిన వారు ఆల్కహాల్, స్మాకింగ్ లకు కూడా తరచుగా అలవాటుపడినట్లుగా కూడా తెలిపారు.

ఏ డ్రింక్ తాగని పిల్లలలో కంటే, కార్బోనేటెడ్ సాఫ్ట్ డ్రింక్స్ తాగే యువకులలో 9 నుండి 15 శాతం అధికంగా దూకుడు ప్రవర్తన వున్నట్లు....ఇదే మాదిరి ప్రవర్తన ఆల్కహాల్ తాగడం, స్మాకింగ్ చేయడం చేసిన పిల్లలలో కూడా వుంటుందని పరిశోధన తేల్చింది. సాఫ్ట్ డ్రింక్స్ లో వుండే షుగర్, కేఫైన్ వంటి పదార్ధాలవలన, ఇతర కారణాలవలనవీరికి ఈ రకమైన దూకుడు ప్రవర్తన అలవడి వుండవచ్చని రీసెర్చర్లు భావిస్తున్నారు. ఈ ఫలితాలను ఇంజరీ ప్రివెన్షన్ అనే ఆన్ లైన్ జర్నల్ లో ప్రచురించారు. మరి ఇంత తెలుసుకున్న తర్వాత అయినా మనం పిల్లలకు కూల్ డ్రింకులు హాని చేస్తాయని తెలిపి వాటిని మానిపించే ప్రయత్నం చేద్దామా?