పిల్లలు వారి ట్యూషన్ చదువులు!

Kids

oi-Nageswara

By B N Sharma

Published: Tuesday, April 3, 2012, 11:57 [IST]

తల్లితండ్రులు ఇంటివద్ద పిల్లలకు చదువులలో ఆసక్తి కలిగించి వారి హోం వర్కు బాగా చేయిస్తే, స్కూలు లో వారి చదువులు అద్భుతంగా వుంటాయి. అది పిల్లలకు కూడా ప్రధానమని తెలుస్తుంది. హోంవర్కులకు తల్లితండ్రులు సహకరించటమంటే, గంటల తరబడి వారిని చదివించాలని కాదు. తల్లితండ్రులు పిల్లలకు చదవటంలో గల నైపుణ్యతలను నేర్పించాలి. ఏవైనా సమస్యలుంటే వాటిని ఎలా అధిగమించాలనేది పిల్లలకు తెలియజేయాలి. లేదా నిరంతరం చదివే పిల్లలకు కొంత విరామం కావాలని తెలిపి దానిని ఆచరించేలా చూడాలి. ఈ ప్రక్రియలో తల్లితండ్రులు కూడా ఎంతో కొంత తెలుసుకోవచ్చు.

పిల్లల చదువు విషయంలో తల్లితండ్రులు చేయాల్సినవి పరిశీలించండి. పిల్లల టీచర్లను బాగా తెలుసుకోండి. స్కూలులోని పేరెంట్ -టీచర్ సమావేశాలకు హాజరుకండి. హోంవర్కు విధానాలు వాటిలో మీరు ఎంతవరకు జోక్యం చేసుకోవాలి అనేది తెలుసుకోండి. హోం వర్కు చేయటానికి అనువైన ప్రదేశం పిల్లలకు ఏర్పరచండి. పిల్లలు బాగా వెలుగువున్న ప్రదేశంలో చదివేలా చేయండి. వారికవసరమైన పేపర్లు, పెన్సిళ్ళు, జిగురు, కత్తెరలు వారికి అందుబాటులో వుంచండి.

ఇంటివద్ద చదివే ప్రణాళిక తయారు చేయండి. పిల్లలు తయారు చేసే ప్రణాళికకు మీరు సహకరించండి. హోం వర్కు ఎక్కువగా వుంటే దానిని కొన్ని సార్లుగా చేయించండి. అవసరమనుకుంటే రాత్రి వేళ కూడా చేయించండి. వారికి ఏ రకమైన ఆటంకాలు లేకుండా చూడండి. అంటే టి.వి. పెద్దగా పెట్టటం వంటివి వుండరాదు. ఫోన్ కాల్స్, మ్యూజిక్ వంటివి ఆ సమయంలో లేకుండా చూడండి. పిల్లలు వారి హోం వర్కు స్వంతంగా చేసుకునేలా చూడండి. సూచనలు మీరు ఇవ్వండి. అది పిల్లల పని కనుక వారే చేసుకోవాలి. మీరు వారికి ప్రోత్సాహం ఇవ్వాలి. పరీక్షలు పెట్టాలి. చేసిన హోం వర్కు పరిశీలించండి. ఖర్చులు, ఇతర విషయాలలో మీరు వారికి ఆదర్శంగా వుండాలి. మీరు పుస్తకం చదివితే, పిల్లలు కూడా పుస్తకం చదవటం నేర్చుకుంటారని గ్రహించండి. సలహాలకంటే కూడా పిల్లలకు ఆచరణ ఉత్తమమైనది. హోం వర్కు అధికంగా వుండి పిల్లలు చేయలేకుంటే, సమస్యగా వుంటే, టీచర్ తో మాట్లాడి సమస్యను పరిష్కరించండి. కొంతమంది పిల్లలకు స్కూలులో బోర్డు చూడటం వంటి సమస్యలుంటే, కళ్ళ అద్దాలు అవసరమా? అని పరిశీలించి వారికి ఏర్పరచండి.