పిల్లల విజయాలు తల్లితండ్రుల సహకారం పైనే!

తాజాగా స్టాన్ ఫోర్డ్ యూనివర్శిటీలో చేయబడిన ఒక రీసెర్చి మేరకు తల్లితండ్రులు, టీచర్లు సున్నితమైన పిల్లల్ని పెంచటం కష్టమని వారిలో తెలివితేటలు అధికంకావాలంటే ఎంతో కష్టపడాలని భావిస్తారని, అయితే సున్నితమైన పిల్లలు ప్రత్యేకమైన తెలివితేటలు కలిగి సరైన వాతావరణంలో ఎంతో అభివృధ్ధి చెందుతారని మొదటినుండి తెలివైన వారుగా భావించే పిల్లల కంటే కూడా వీరు భవిష్యత్తులో ఎంతో బాగుంటారని తేలింది.

రీసెర్చర్లు తమ పరిశోధనలో 338 కిండర్ గార్టెన్ పిల్లలను పరిశీలించారు. వారి టీచర్లతోను, కుటుంబ సభ్యులతోను విచారించారు. కుటుంబ పరిస్ధితుల ప్రభావం వారిపై ఎలా వుంటుందనేది గమనించారు. కుటుంబ ప్రభావాలు వారి కెరీర్ అభివృధ్ధికి ఏరకంగా దోహదం చేస్తాయనేది రీసెర్చి చేశారు. వారి పరిశోధనలో, కుటుంబంలో జరిగే చెడు, మంచి రెండు రకాల సంఘటనలు వారిపై ప్రభావాన్ని చూపి ఒత్తిడి కలిగిస్తున్నాయని, ఈ రకంగా కలిగే ఒత్తిడి వారి భవిష్యత్ అభివృద్ధికి దోహదపడుతోందని వెల్లడించారు.

పిల్లలు ఎంత అమాయకంగా వున్నప్పటికి సరైన రీతిలో పెంపకాలు చేస్తే అది వారి భవిష్యత్తుకు బాగా ఉపయోగపడగలదని తెలిపారు. కనుక పిల్లలకు ఒత్తిడి ఇవ్వకపోవటమనేది సరికాదని, ఒత్తిడి ఇవ్వటం మంచిదేనని అపుడే వారి బుద్ధి బాగా వికసిస్తుందని రీసెర్చర్లు వెల్లడించారు.