డెలివరీ తర్వాత మహిళా ఫ్యాషన్?

By B N Sharma

Published: Friday, September 9, 2011, 9:56 [IST]

డెలివరీ అయిన తర్వాత మహిళలు వారి దుస్తులపట్ల కొంచెం జాగ్రత్త తీసుకోవాలి. ఎందుకంటే తరచుగా బిడ్డకు పాలు పట్టాల్సివస్తుంది. డెలివరీ తర్వాత బరువు పెరిగిందా? లేక తగ్గిందా? అనే మాట అటుంచినా, గర్భసంచి సైజు తగ్గాలంటే కనీసం 5 నుండి 6 వారాలు పడుతుంది. కనుక వీలైనంత సౌకర్యంగా వుండటానికిగాను వదులుగా వుండే దుస్తులు వాడాలి. ఏ మాత్రం టైట్ గా వున్నా అసౌకర్యం భావించటం జరుగుతుంది. కనుక ఈ దుస్తులు ఎలా వుండాలో చూద్దాం.

అందమైన, ఆకర్షణీయమైన రంగులు ఎంపిక చేయండి. అవి మీ మనోభావాలను చక్కగా వుంచుతాయి. రంగుల పూలు వున్నగుడ్డలైతే ఇంకా బాగుంటుంది. లైట్ కలర్ దుస్తులు వాడవద్దు. బేబీకి పాలు, ఆహారం ఇచ్చేటపుడు మరకలయ్యే ప్రమాదముంది. బ్యాగీ లేదా లూజుగా వున్న టి షర్టులు సాగిన పొట్టను వీలైనంత వరకు కవర్ చేసే అవకాశం వుంది. లూజుగా వుండే పేంట్లు కూడా మంచిదే. నడుము చిన్నదిగా వుండి షేప్ రాలేదనుకుంటే ఒక బెల్ట్ పెట్టండి. స్టైలిష్ గా కూడా వుంటుంది. మోకాళ్ళ వరకు వున్న టీ షర్టు డెలివరీ తర్వాత చాలా బాగుంటుంది. ఇంకా అందంగా కనపడాలంటే మెడకు ఒక రంగు గుడ్డ చుట్టేయండి. వేసే షర్టులకు బటన్లు వుండేలా చూడండి. బిడ్డకు పాలు పట్టటానికి అనుకూలం. బ్రా వంటివి కొంతకాలం ఆపుకుంటే సౌకర్యంగానే వుంటుంది. టీ షర్టులు లేదా పైన వేసే టాప్స్ 'వి' నెక్ తో వుంటే ఆకర్షణీయం.

ఇక కాళ్ళకు తేలికైన పలచని చెప్పులు లేదా స్లిప్పర్స్ వేయండి. బేబీని చేతిలో వుంచుకున్నా తేలికగా నడిచే చెప్పులై వుండాలి. ప్రస్తుతం పాలు పట్టే తల్లులకు అవసరమైన లో దుస్తులు వస్తున్నాయి. అవసరమనుకుంటే వీటిని ధరిస్తే మీరు మీ పూర్వపు సైజు శరీరాన్ని పొందటం కూడా తేలిక కాగలదు.

ఈ పద్ధతులు పాటించి ఒక బిడ్డ పుట్టిన తర్వాత కూడా ఎంతో స్టైలిష్ గా వుండే ఆనందాన్ని పొందండి.