సిజేరియన్ అయితే రెండో బిడ్డ ఎపుడు కలగాలి?

గతంలో ఒక సారి సిజేరియన్ అయితే, రెండో బిడ్డ సహజంగా యోని ద్వారా పుట్టే అవకాశం వుండదని మరోమారు సిజేరియన్ చేయాలనే భావన వుండేది. కాని ఇది సరి కాదని అనేక కేసుల్లో నిరూపించారు. ఏదేని ప్రత్యేక కారణాలు లేదా అవసరాలు వుంటే తప్ప సిజేరియన్ చేయాల్సిన అవసరం వుండదని వైద్య నిపుణులు వెల్లడిస్తున్నారు. సిజేరియన్ ఒక సారి అయిన మహిళ రెండో సిజేరియన్ కు ఆమె శరీరం ఎంత వరకుసహకరిస్తుందనేది కూడా పరిశీలించాలి. ఆమెకుగల గత అనుభవాలు ఆమెను భయపెట్టేలా చేసి రెండవ బిడ్డ జననానికి సిజేరియన్ కు సైతం ఆమె అంగీకరించకపోవచ్చు.

ఒక సారి సిజేరియన్ అయిన మహిళకు రెండవ కాన్పు సమయంలో మహిళ, సంబంధిత వైద్యుడు చాలా జాగ్రత్తలు తీసుకోవాలి. గతంలోని మచ్చ వద్ద ఏ మాత్రం మరోమారు చిరుగుపడ్డా అది ఆమెకు హాని కాగలదు. కనుక సంబంధిత వైద్యుడి ద్వారా ఆమె తనకు అనుకూలమైన డెలివరీ ఏదో అనేదానికి తగిన సలహా పొందాలి. రెండో గర్భం ప్లాన్ చేసే ముందు గత డెలివరీ రికార్డులను పరిశీలించాలి. మొదటి గర్భం సిజేరియన్ అయినప్పటికి వైద్యుడు చెప్పిన తర్వాత రెండో గర్భం ధరించటానికి మహిళ ఏ మాత్రం భయపడనవసరం లేదు.