తల్లికి పాలు బాగా పడాలంటే?

Post Natal

oi-Nageswara

By B N Sharma

Updated: Saturday, July 28, 2012, 14:35 [IST]

శిశువు జన్మించినప్పటి నుంచి బాలింతలు అత్యధిక విలువలుకల పోషకాహారం తీసుకోవాలి. జంక్ ఫుడ్ లు, పచ్చళ్లు, మైదాతో చేసిన ఆహార పదార్థాలను బాలింతలు తీసుకోకూడదని న్యూట్రీషన్లు అంటున్నారు. కేకులు, పేస్ట్రీలు, బిస్కట్లు, పఫ్‌లు,మొదలైన బేకరీ తిండ్లు తినడం వల్ల బాలింతలు వెంటనే అధిక బరువు పెరిగిపోవటానికి అవకాశాలు మెండుగా వున్నాయి. అలాగే టీ, కాఫీలు తీసుకోవడం వల్ల శరీరానికి కావాల్సిన ఇనుము అందదు. అందుచేత బయట అమ్మే వస్తువులు బాలింతలు తీసుకోరాదు. ఇంకా బిడ్డలకు పాలిచ్చే తల్లులు రాజ్‌మా సెనగపప్పు, మొలకలు వంటి వాటిని తినడం వల్ల బిడ్డకు కడుపునొప్పి వస్తుందని చాలామంది అనుకుంటారు. కానీ బాలింతకి చక్కని పోషకాహారం అంటే ఈ రకం తృణధాన్యాలతో చేసిన పదార్థాలేనని న్యూట్రీషన్లు సూచిస్తున్నారు. తృణధాన్యాల్లోని మాంసకృత్తులు, జింక్, ఇనుము పుష్కలంగా పాలు పడి బిడ్డకు చక్కటి ఆహారాన్ని కూడా అందిస్తాయని వీరు చెపుతున్నారు.

సాధారణంగా బిడ్డకు జన్మనిచ్చిన ఆనందంలో మహిళలు తమ పట్ల శ్రధ్ధ చూపరు. పూర్తిగా కొత్తగా పుట్టిన బిడ్డపైనే ధ్యాస పెడతారు. కాని బిడ్డకు మంచి పోషక విలువలతో కూడిన ఆహారం అందాలంటే తల్లులు కూడా సరి అయిన సమయంలో సంతులిత ఆహారాన్ని తినటం ఎంతో ప్రధానం. కొత్తగా తల్లులైన మహిళలు తీసుకోదగిన ఆహారం -
1. డెలివరీ అయిన తర్వాత తల్లులకు మంచి శక్తి కావాలి అందుకుగాను సంపూర్ణ గింజ ధాన్యాల ఆహారం తీసుకోవాలి. ఎంపిక చేసిన పాలఉత్పత్తులు, తాజా కూరలు, తాజా పండ్లు తినాలి. రోజులో మొదటగా తల్లి ఎండు ఫలాల మిల్క్ షేక్ తాగి తగిన శక్తి పుంజుకోవాలి. ఏరకమైన డ్రై ఫ్రూట్స్ ఇందులో వేయాలనేది వైద్యులను సంప్రదించవచ్చు.
2. బ్రేక్ ఫాస్టులో ముడిబియ్యంతో చేసిన ఇడ్లీలు, దోశ లేదా బ్రెడ్ శాండ్ విచ్ తినాలి. యాంటీ ఆక్సిడెంట్లు కల మంచి పండ్లరసం కూడా బ్రేక్ ఫాస్టుతో తీసుకోవచ్చు.
3. బ్రేక్ ఫాస్టు - లంచ్ ల మధ్య ఒక కప్పు టీ తాగాలి. టీలో వున్న ఔషద విలువలు శరీరానికి, మైండ్ కు మంచి శక్తిని, ఉత్సాహాన్ని ఇస్తాయి. దీనికి ముందు కొద్దిపాటి తేలిక వ్యాయామాలు చేయాలి.
4. వేడినీటితో స్నానం తర్వాత, వేడిగా జీరా లేదా మిరియాలు వేసి కాచిన రసం, ఒక సలాడ్, కొద్దిపాటి అన్నం, మజ్జిగ కలిపిన అన్నం తింటే శక్తి వస్తుంది. ఈ భోజనం తర్వాత ఒక పాన్ వేసుకుంటే మంచి ఖనిజ లవణాలు చేకూరి నిద్రకూడా బాగా పడుతుంది.
5. సాయంత్రం కొద్ది నడక తర్వాత కొబ్బరి నీరు, కేరట్ జ్యూస్ లేదా పుచ్చకాయ లేదా కుకుంబర్ జ్యూస్ తాగితే శరీరంలో నీటి సమతుల్యత కలుగుతుంది.
6. నీరు అధికంగా తాగాలి. పండ్లు, కూరలు బాగా తింటే బిడ్డకు కావలసిన పాలు పడతాయి.
7. ఇక రాత్రి భోజనంలో కొద్దిపాటి అన్నం, రసం, కొచెం నెయ్యి, ఆకు కూరల కూర, మజ్జిగ వుండాలి.
8. పడుకునే ముందుగా ఒక గ్లాసెడు పాలు ఆరోజుకు ఒక కొత్త తల్లి తినాల్సిన ఆహారాన్ని పూర్తి చేస్తాయి.