ప్రసవించిన మహిళకు జననాంగ భాగ సమస్యలు?

By B N Sharma

Published: Tuesday, July 17, 2012, 15:33 [IST]

Health Problems of A Woman After Delivery!

సాధారణంగా చాలామంది మహిళలు ప్రసవం తర్వాత తమ ఆరోగ్యం విషయంలో అంతగా శ్రద్ధ తీసుకోరు. వారి శ్రధ్ధ అంతా పుట్టిన బిడ్డపైనే వుంటుంది. తమకు పుట్టిన బిడ్డను చూసుకొని మురిసిపోతూంటారు. తమ ఆరోగ్యం పట్ల శ్రధ్ధ వహించరు. బిడ్డ అవసరాలకు గాను వీరు ఎంతో శ్రమిస్తూ ఉంటారు. కనీసం గతంలో తాము గర్భవతిగా ఉన్నప్పుడు తీసుకున్న శ్రద్ధ కూడా ప్రసవం జరిగిన తర్వాత తీసుకోకపోవడంతో వీరిలో వివిధరకాల ఆరోగ్య సమస్యలు ఏర్పడతాయి.

ప్రసవం తర్వాత మహిళలో ఇన్‌ఫెక్షన్‌, కొద్దిపాటి జ్వరం రావడం, మూత్ర సంబంధిత సమస్యలు, స్తనాల సమస్యలు, నరాల్లో రక్తం గడ్డ కట్టడం వంటి అనారోగ్య సమస్యలు ఎదురవుతాయి. వీటన్నిటికి తోడు, మహిళకు కనుక సిజేరియన్ డెలివరీ అయితే, ఆమె పరిస్ధితి మరింత బాధాకరంగా ఉంటుంది. జననాంగ భాగంలో వేసిన స్టిచెస్ త్వరగా మాన్పు పట్టవు. ఆమెకు ఆ భాగంలో తీవ్ర సమస్యలు ఎదురవుతాయి.

ఈ అనారోగ్య సమస్యలను దృష్టిలో పెట్టుకొని డెలివరీ అయిన తర్వాత మహిళలు కొన్ని జాగ్రత్తలు తప్పనిసరిగా తీసుకోవాల్సి ఉంటుంది. మహిళల్లో కాన్పు తర్వాత ఏర్పడే ఇన్‌ఫెక్షన్‌లను ప్రసూతి అంటువ్యాధులు అంటారు. ఈ ఇన్‌ఫెక్షన్‌లు ప్రసవం తర్వాత తగినంత రక్తం లేకపోయినా, గర్భవతిగా వున్నపుడు తీవ్రంగా రక్తపోటుకు గురయినా, లేక పోషకాహార లేమితో బాగా బలహీనంగా వున్నా వస్తాయి.

ప్రసూతి సమయంలో, బొడ్డుతాడు కిందికి ఉండడం, డెలివరీ తర్వాత దానికి సంబంధించిన కొన్ని ముక్కలు బిడ్డతో పాటు పూర్తిగా బయటకురాకుండా లోపలే ఉండిపోవడం వల్ల కూడా అంటువ్యాధులు ఏర్పడతాయి. ఈ ఇన్‌ఫెక్షన్‌ల కారణంగా స్త్రీలకు శారీక నొప్పులు, దుర్వాసనతో కూడిన యోని స్రావం, నీరసం, కడుపు నొప్పి మొదలైన అసౌకర్యాలు ఏర్పడతాయి. ఆమె పొట్ట, శరీరంలోని ఇతర అవయవాలు కూడా ఇన్ ఫెక్షన్ కు గురవుతాయి.

కనుక మహిళకు ప్రసవం ముందు, ప్రసవం సమయంలో ఎంత వైద్య సౌకర్యం అవసరమో, ప్రసవం తర్వాత కూడా ఆమెకు అంతే వైద్య సౌకర్యాలు అవసరమని గుర్తించాలి. ఒక రకంగా చెప్పాలంటే, ఈ సమయంలో ఆమె తనపైన తానే కాదు శ్రధ్ధ తీసుకోవలసింది, బిడ్డ పట్లకూడా జాగ్రత్తలు తీసుకుంటూ ఉండాలి. అందుకుగాను ఆమెకు తగిన వైద్యం తప్పక అందుబాటులో ఉండాలి.