మహిళకు ప్రసవం తర్వాత ఇన్‌ఫెక్షన్‌లు!

By B N Sharma

Published: Friday, March 16, 2012, 9:58 [IST]

చాలామంది మహిళలు ప్రసవం తర్వాత తమ ఆరోగ్యం విషయంలో అంతగా శ్రద్ధ తీసుకోరు. గర్భవతిగా ఉన్నప్పుడు తీసుకున్న శ్రద్ధ, జాగ్రత్తలు కాన్పు జరిగిన తర్వాత వారు తీసుకోకపోవడంతో మహిళల్లో పలు రకాల ఆరోగ్య సమస్యలు ఏర్పడతాయి. డెలివరీ తర్వాత స్ర్తీలలో ఇన్‌ఫెక్షన్‌, జ్వరం రావడం, మూత్ర సంబంధిత సమస్యలు‌, స్తనాల సమస్యలు‌, నరాల్లో రక్తం గడ్డ కట్టడం వంటి ఆరోగ్య సమస్యలు ఎదురవుతాయి. దీన్ని దృష్టిలో పెట్టుకొని డెలివరీ తర్వాత మహిళలు ప్రసవానంతర ఆరోగ్య జాగ్రత్తలు తప్పనిసరిగా తీసుకోవాల్సి ఉంటుంది.

ఈ రకమైన ఆరోగ్య సమస్యలతోపాటు, పుట్టిన బిడ్డ విషయంలో శ్రద్ధ వహించాల్సి వుంటుంది. తల్లి ఆరోగ్యం ఏ మాత్రం సరిలేకపోయినా, దాని ప్రభావం బిడ్డ ఆరోగ్యంపై వుంటుంది. అందుకుగాను మహిళ తప్పనిసరిగా వైద్య సలహాలు పాటించాలి. లేకుంటే, మహిళ ఈ సమయంలో చాలా బలహీనపడి వుండటంతో, ఏ వ్యాధి లేదా సమస్య వచ్చినప్పటికి అది పరిష్కరించబడేసరికి చాలా సమయం తీసుకుంటుంది. మహిళల్లో కాన్పు తర్వాత ఏర్పడే ఇన్‌ఫెక్షన్‌లను పర్పురల్‌ ఇన్‌ఫెక్షన్స్‌ అంటారు.

ఈ ఇన్‌ఫెక్షన్‌లు డెలివరీ తర్వాత సాధారణంగా రక్తం లేనివాళ్లు, ప్రెగ్నెన్సీ సమయంలో రక్తపోటు కలిగి ఉన్నవాళ్లు, బాగా నీరసంగా ఉన్నవాళ్లకి వస్తాయి. దీంతో డెలివరీ సమయంలో బాగా బ్లీడింగ్‌ కావడం, మాయ కిందికి ఉండడం, డెలివరీ తర్వాత మాయ ముక్కలు లోపలే ఉండిపోవడం వల్ల కూడా ఇన్‌ఫెక్షన్‌లు ఏర్పడతాయి. ఈ ఇన్‌ఫెక్షన్‌ల మూలంగా మహిళలకు శారీరక నొప్పులు, నీరసం, కడుపు నొప్పి, దుర్వాసనలతో కూడిన యోని ద్రవాలు బయటకు రావటం జరుగుతుంది. గర్భాశయం ఇన్‌ఫెక్షన్‌ వలన పొట్ట మాత్రమే కాక ఆ ఇన్ ఫెక్షన్ పూర్తిగా శరీరానికి వ్యాపించే అవకాశం కూడా వుంటుంది.